صلاحالدین ربانی تشقی ایشلر وزیری و معصوم استانکزی مدافعه وزیرلیگی سرپرستی بولیب تعیین ایتیلگنیدن کیین، تینچلیک یوکسک کینگشی باشلیغسیز قالگن.
افغانستان تینچلیک یوکسک کینگشی اعضالریدن بیری عبدالخالق پشهیینینگ، تینچلیک سوزلشوولری توغریسیده سلاموطندارگه ایتیشیچه، تینچلیک یوکسک کینگشی باشلیغسیزلیگی باعث، دولت بیلن طالبلر اورتهسیدهگی تینچلیک سوزلشوولری توختهتیلگن. جناب پشهییگه کوره، طالبلرنینگ نیچه تامانلمه بولگنی تینچلیک سوزلشوولری آلغه باریشی خصوصیده، یخشی زمینه یرهتگن؛ بیراق اوشبو کینگش باشلیغسیزلیگی باعث، لایحهلر نتیجهسیز قالگن.
جناب پشهیینینگ ایتیشیچه، مذکور کینگش ریاستی بیلن تینچلیک یوکسک کینگشی دارالانشاء ریاستینینگ، چوکیلری بوش بولگنیدن کیین، تینچلیک یوکسک کینگشی بیلن جنگری گروهلر اورتهسیده هیچ قندهی رسمی سوزلشوو اوتکزیلمهگن. جناب پشهییگه کوره، حاضرگی شرایط تینچلیک سوزلشوولرینی آلغه آلیب باریش خصوصیده، یخشی فرصت ایدی؛ دیمک پاکستان بیلن چین ینگی دور تینچلیک سوزلشوولریدن میزبانلیک قیلیشگه علاقه کورستگن. بیزلر اوشبو فرصتدن یخشی صورتده فایدهلهنیشیمیز لازم.
عین حالده، جمهور رییس سوزلاوچیسی اورین باسری سیدظفر هاشمینینگ سلاموطندارگه ایتیشیچه، تینچلیک یوکسک کینگشینینگ، باشلیغی توغریسیده بحث اوتکزیلماقده و تیزلیکده اوشبو کینگش باشلیغی تانیشتیریلیشی ممکن.
سیاسی ایش بیلرمانلردن بیرقطارینینگ ایشانچیگه کوره، تینچلیک یوکسک کینگش ریاستینینگ یوتوقلری، اوشبو ریاست خرجتیگه قرهگنده، جوده هم آز دیر. انچه پیت آلدین تینچلیک یوکسک کینگش ریاستی رسمیلریدن بیرینینگ بغلانده ایتیشیچه، سونگی پیتلرده افغانستان دولتی بیلن طالبلر اورتهسیده اوتکزیلگن تینچلیک سوزلشوولری 13 میلیون دالر خرجت کوترگن.
