تینچلیک عالی کینگشی مسؤوللری‌نینگ ایتیشیچه، حکومت‌نینگ تینچلیک برنامه‌سیده ایریم منطقه‌لرنی طالب‌لرگه تاپشیریش موضوعی گه اورین یوق دیر. نیچه وقت آلدین، اسلامی حزب رهبری گلبدین حکمتیارنینگ ایتیشیچه، تینچلیک تأمین‌لنیشی اوچون ایریم منطقه‌لرنی طالب‌لرگه تاپشیریش کیره‌ک؛ بیراق تینچلیک عالی کینگشی مسؤوللری، ایریم منطقه‌لرنی طالب‌لرگه تاپشیریش موضوعی‌نی کیسکین رد قیلگن.
حکمتیارنینگ بیانات‌لری مِش-مِش‌لرگه سبب بولدی و بو مِش-مِش‌لر اساسیده، حکومت طالب‌لر بیلن کیلیشیب هرات و باشقه نیچه ولایت‌نی مذکور گروه گه تاپشیریشی ایتیلگن.
بوگون کابل‌ده خبری بیر ییغین اوتکزگن تینچلیک عالی کینگشی دبیرخانه باشلیغی محمداکرام اخپلواک‌نینگ ایتیشیچه، حکومت‌نینگ تینچلیک ریجه‌سیده طالبان گروهی گه قیسی بیر ولایت یا-ده تومن‌نی تاپشیریش موضوعی کیریتیلمه‌گن.
اونینگ کوپه‌یتیریشیچه، تینچلیک برقرار ایتیلیشی توغریسیده سعی و حرکت‌لر دوام ایتماقده و حاضر تینچلیک برقرار ایتیلیشی اوچون اهالی و دین عالم‌لری آره‌سیده‌گی بیرلشمه هر زماندن کوره مستحکم‌لشگن. اونگه کوره، کیله‌جک یقین آره‌ده تینچلیک سوزلشوولری یوتوقلری نمایان ایتیله‌دی.
تینچلیک عالی کینگشی دبیرخانه باشلیغی‌نینگ ایتیشیچه، اندونیزیاده یولگه قوییلیشی کوتیلگن ییغین اوتکزیلگنیدن سونگ، افغانستانده تینچلیک تأمین‌لنیشی اوچون اسلامی مملکت‌لرنینگ دین عالم‌لری خلق ارا بیر ییغین یولگه قویه‌دی.
کابل پروسه‌سی ییغینیده جمهور رییس غنی اوتمیش گه قرشی، طالبان گروهی بیلن «شرط سیز» سوزلشووگه حاضر بولگنینی بیلدیردی و شونینگ‌دیک، «طالب‌لرنینگ سیاسی بیر حزب صفتیده رسمیت‌گه تانیش، مذکور گروه رهبرلریگه قرشی بولگن تحریم لر رفع ایتیلیشی، اساسی قانون گه قیته تیکله نیشی و تینچلیک لایحه سیگه قوشیلگن طالب‌لرنینگ امنیتی تأمین ایتیلیشی» شامل بولگن بیر مکتوب نی طالبان گروهی‌گه تکلیف قیلدی. بیراق، حاضرگچه طالبان گروهی تامانیدن بو توغریده هیچ قنده‌ی عکس‌العمل بیلدیریلمه‌گن.
