میمنه شهری نینگ کوپلب دوکانلر لوحهلری اوزبیکچه قیلیب یازیلدی. بو جوشقین حرکت میمنه شهرینینگ مدنی فعاللری، یشاوچیلر و دوکاندارلری ایستهگی اساسیده بولگنلیگی ایتیلماقده.
سلاموطندارنینگ فاریابدهگی مخصوص مخبری نینگ معلوم قیلیشیچه، میمنه شهریده جایلشگن دوکاندارلر اوز چونتکلریدن خرج قیلیب دوکانلری لوحهلرینی اوزبیکچه قیلیشگه اولگورگنلر.
فاریاب بیلیم یورتی بشری بیلیملر فاکولتهسی اوزبیکچه بولیمی اوقیتوچیسی احسانالله قووانچ نینگ معلوم قیلیشیچه: «حاضرگی یولگه قویلگن مدنی حرکتنی، فقط اساسی قانونده بیریلگن حقلرگه مطابق آنه تیل رواجلنیشی، شهروندلیک حقیگه ایگه بولیش، تیل ترقیاتی و ملتنی اویغاتیش اوچون هر بیر انسان بورچی ایکنلیگینی عملده ثابت قیلش نیتیده باشلهدیک.»
شونینگدیک میمنهلیک یازووچی و شاعر حمیدالله بوتون حیدری نینگ سلاموطندارگه ایتیشیچه، بو باشلنگن حرکت ینگی نسل اولادی اوچون اوته مهم و کته تأثیر قالدیرووچی بیر یونهلیش بولهدی و کیلهجکلرده تاریخی یادگارلیک بولیب اوزبیکلر اوتمیشی و کیلهچگیگه بیر کوزگو بولیب قالهدی.
جناب بوتون حیدری نینگ ایتیشیچه، بوندن آلدین بیزنینگ تاریخیمیزده بولگن ایشلر کوزدن یاشیریلگن و بولمهگن ایشلر بجریلیشیگه دقت قیلینمهگن ایدی، ایندی ایسه بو حرکت بیلن کیلهجک اولادگه تیلیگه خذمت قیلیش توشینچهسی کوپراق توغیلهدی و ایجابی ایشلر بولیش چیگینی شوییردن آچیله باشلهیدی.
تینیق احساس بیلن آنه تیلیگه دوکانی لوحهسینی یازدیرگن نجیبالله، حاضرگه قدر باشقچه تیلده یازیب قویگن لوحهلر بیلن کیملیگیمیز انیق ایمس ایدی، ایندی ایسه اوزبیکچه یازیلگن لوحه میز بیلن بیزنی اوزبیکلیگیمیزنی برچه بیلیب آلهدی و بو ایش تیلیمیز اوچون کته اهمیتگه ایگه، مین اوزبیکلیگیمگه قوانهمن دیدی.
نجیبالله بو ایش بیلن باشقه تیللرگه قرشی ایکنلیکینی کورسهتیش ایمس، بلکه اوز تیلینی سیوگنلیگینی بیلدیریش اوچون بیر حرکت بولگنلیگینی ایتگن.
آنه تیلنی رونقی و ترقیاتی هر بیرکیشی بورچی ایکنلیگینی نجیبالله دوکاندار معلوم قیلهدی.
فاریاب مدنیت و اخبارات ریاستی باشلیغی عبدالرشید منصوری میمنه شهری جمهورلیک جادهسیده لوحهلرنی اوزبیکچه یازیلیشینی خوش قرشیلب ایتیشیچه، اوشبو حق مملکت اساسی قانونی نینگ مادهلریده آچیقلنیب بیریلگن. او، میمنهلیکلر طرفیدن اوتکزیلگن بو حرکتنی اوز آنه تیللریگه حرمت بیریش و اوزلرینی قیته تاپیش دیب بیلهدی.
شونینگدیک جناب منصوریگه کوره، پشتو و دری تیللری یانیده، کوپچیلیک یشه یدیگن ایلتلر تیلی اوز منطقهلریده رسمی دیب اساسی قانونده کیلگن. شو اوچون اوزبیک تیلی فاریاب و شونگه اوخشهگن اوزبیکلر استقامت قیلهدیگن ولایتلرده اوزبیک تیلی رسمی تیل قبول قیلینیشنی ایستهدی.
تانیقلی یازووچی کاظم امینی "تیلگه بها ایلگه بها" دیگن شعارنی تیلگه آلیب، بیز اوزبیک تیلیده لوحهلرنی قندهارده و شونگه اوخشش اوزبیکلر حیات کیچیرمهیدگن ییرلرده یازیلیشینی ایسته میمیز، بلکیم بیز اوزبیکلر کوپچیلیکنی تشکیل ایتهدیگن ولایتلرده اوزبیکچه لوحهلر یازیلیشینی ایسته یمیز دیدی.
جناب امینی تیلگه بها بیریلگنده ایلگه بها بیریلهدی، هر بیر اوزبیک اوزتیلینی اهمیتینی بیلمهگنده، باشقه تیلده سوزلشهدیگنلر اوشبو تیل اهمیتینی بیلمیدی دیب بیلهدی. اونینگ معلوم قیلیشیچه، اوزبیکلرنی افغانستان بویلب باشقه قوملرگه تانیشتیره دیگن بیرینچی یول انه شو آنه تیللری بولگن.
امینی دولتنی اوزبیک تیلی رونقی اوچون هیچ بیر ایش قیلمه گنلیگینی تنقید قیلیب، بو تیل اوچون حاضرگی بولهدیگن حرکتلر 10 ییل آلدین باشلهنیشی کیرهک ایدی دیگن. او، اوزبیکلرگه عاید مدنی بارلیکلرینی ترقیاتی خصوصیده بولهدیگن ایشلر بوندن هم کوره جدی شکلده آلغه سوریلیشی بارهسیده علیحده تاکید ایتگن.
میمنهلیک دوکاندارلرنینگ ایتیشلریچه، اوشبو حرکت دوکاندارلرگه کته تأثیر قویگن و بوندن کیین هربیر دوکاندار اوز لوحهسینی آنه تیللری بولمیش اوزبیک تیلیده یازیشلرینی ایستهیدیلر.
بوندن آلدین هم فاریاب ولایتینینگ اندخوی تورتلهتومنی، جوزجان و سرپل ولایتلریده اوزبیک تیلیده لوحهلر یازیلگنلیگی خصوصیده اجتماعی ترماقلرده گزارشلر یازیلگن ایدی.
ایتیلیشیچه، فاریاب ولایتینینگ اندخوی تورتله تومنیده لوحهلر اوزبیک و تورکمن تیللریده یازیلیش تشبثی بیرینچی فاریاب ملت وکیلی بشیر احمد تهینچ تامانیدن یولگه قوییلگنلیگی معلوم قیلینگن ایدی.
