بوگون (چهارشنبه) کابلده افغانستان تورکلری مطبوعات انجمنی اوتکزیب «پشتون، تاجیک، اوزبیک، هزاره، تورکمن، قزاق، قیرغیز، ایماق، براهوی، پشه‌یی، بلوچ» و باشقه ایلت‌لرکبی «تورک» سوزی برقی کیم‌لیک و اساسی قانونگه سیغدیریلیشینی سوره‌دیلر.
یولگه قویلگن ییغین (اوزبیک‌لر، ترکمن‌لر، قرلوق‌لر، تاتارلر، تیموری‌لر، ایماق‌لر، قیرغیز- قزاق‌لر و…) تورک ایلت‌لرنینگ مدنی و اجتماعی تشکیلاتلری خبری انجمن آلیب، برقی کیم‌لیک و اساسی قانونگه «تورک» سوزی یازیلیشینی طلب قیلدیلر.
اوتکزیلگن ییغینده چیقیش قیلیب نطق سوزله‌گنلر برقی کیم‌لیک ترقه‌تیش ایشی تیزلشتیریلیب، اونگه اوزلرینی تورک دیب یازیلیشی‌گه تأکید قیلگن‌لر.
اوشبو ییغینده افغانستان تورکلری نینگ سیاسی و علمی سیمالری قوشیمچه مدنی جماعه‌چیلیک فعاللری اشتراک قیلگن.
چیقیش قیلگن تانیقلی سیاستچی، سابق پارلمان منشی‌سی و افغانستان نینگ اوکراین ده‌گی ایلچی‌سی استاد سردارمحمد رحمن اوغلی، ییغین نینگ یولگه قویلیشی‌نی خوش قرشیلب، «خدانینگ قرآنیده ایلت‌لر و طایفه‌لر باره‌سیده کیلگن آیت‌گه اشاره قیلیب» هر بیر شخص‌نینگ کیم‌لیگی انیق و معیین بولیشی اونینگ سیاسی، اقتصادی، اجتماعی و کیشی‌لیک حقوقی حسابنله‌دی دیگن.
حاضرگی شرایط‌ده،کیم‌لیگی و اوز اصلینی بیلیب حیات کیچیریش انسانلر اوچون شرط ایکن‌لیگی اوستیده تأکید قیلگن جناب رحمن اوغلی، «اوزینی تانیگن خدانی تانیدی و اوزینی تانیمه‌گن خدانی تانیالمی‌دی.» دیگن.
جناب رحمن اوغلی، افغانستانده حیات کیچیره‌دیگنلر اوز حقوقی‌گه ایریشگن زمان فخر بیلن افغانلیکنی قبول قیلیش یانیده، بیر یشاوچی صفتیده مملکت‌لری آبادانلیگی اوچون هرتامانلمه سعی وحرکت آلیب باره‌دیلر دییه تاکید قیلگن. ملت‌لر اوز حقوقی‌گه ایگه بولمه‌گن تقدیرده،سیاسی باسیم‌دن چیقیش مقصدیده هر قنده‌ی یول قیدیریشلری ممکن دیب تأکیدلیدی او.
تاتارلر مدنی انجمنی‌نینگ اعضاسی انجنیر مصلح اوز کیم‌لیکلرینی طلب قیلیش عیب ایمسلیگی‌گه اشاره قیلیب، برچه تورک خلقلریدن اوز اصلیت‌لرینی تاپیب کیم‌لیکلرینی آلیش اوچون جدی بولیشلرینی طلب قیلگن.
شونینگدیک اشتراکچی‌لر دولتدن برقی کیم‌لیکلر ترقه‌تیلمسدن آلدین قوملر کیم‌لیگی انیقله‌نیب لایحه‌دن حمایت بیلدیریشی‌نی سوره‌گنلر.
ییغین سونگی‌ده صادر بولگن قطعنامه‌ده دولتدن مساله باره‌سیده بی‌فرق قالمس‌لیگی خصوصیده علیحده تاکید بولگن. شونینگدیک تورکلرنینگ مدنی و اجتماعی تشکیلاتلر اعضالری، افغانستانده حیات کیچیره‌دیگن تورکی خلق‌لردن بو جریاننی قوللب قووتلش‌نی طلب قیلدیلر.
