افغانستانده ایش‌سیزلیک، کم‌بغل‌لیک، ناتینچلیک و یخشی اوقیش گه زمینه یوقلیگی باعث، کوپینچه عایله‌لر و یاشلر مملکت دن تشقری یول آلیب و ناقانونی مهاجرلیک‌که حرکت قیلیشه‌دی.
15 یاشیده بولگن علی بیگ‌زاد، کوپینچه قیین‌چیلیک‌لرنی باشدن کیچیریب و آغیر کونلرنی کوریب ایران بارگن و اوچ ییل نی او ییرده اوتکزگن.
اونینگ ایتیشیچه، ایران ده بولگن اوچ ییل جریانیده کوپلب حقارت قیلینگن و نتیجه ده ایران یشش اوچون یخشی ییر بولمه‌گنینی توشونگن.
ایران ده یشش اوچون کیم‌لیگی یوقلیگی و اوشبو مملکت یشاوچیلری تامانیدن حقارت قیلینگنی سبب، علی ایران ده اوچ ییل نی اوتکزگنیدن سونگ، اروپایی مملکت‌لرگه کیتیش اوچون قرار قیلگن.
علی کوپینچه قیین‌چیلیک‌لر بیلن 500 مینگ افغانی تیارلگن و بو پولنی سویدن گه ییتیش اوچون قاچاقچی گه بیرگن.
سفری ایران-ترکیه چیگره‌سیدن باشلنگن و بو یولده کوپینچه قیین‌چیلیک‌لرگه گواه بولگن.
مهاجرلرنینگ سانی کوپ بولگنی اوچون علی و همراهلری ایری موترلرده مینیشگن. علی نینگ دوستی و همسفری حید مینگن موتر ترکیه نینگ یولیده تصادم قیله‌دی و او دوستی نی قولدن بیره‌دی.
علی کیین خبر بوله‌دی کیم، قاچاقچی‌لر حمیدنینگ تنه‌سیدن کیره‌کلی بولگن اعضالرینی چیقاریب و جسدی نی افغانستانده عایله سیگه تاپشیرگن. او، بو واقعه نی حیاتیده یوز بیرگن اینگ یامان و قیغولی واقعه دییدی.
اوشبو یاش باله دوست‌لری و همراهلری بیلن کوپینچه قیین‌چیلیک‌لرنی باشدن کیچیریب آرزو قیلگن جایلری سویدن گه ییتیشگن.
سویدن ده یشه‌یدیگن ایناغه‌سی خوش قرشی‌لش گه کیلیب و اونی اویی گه آلیب بارگن. علی بیش ییل دن بیری ایناغه‌سی نینگ اوییده یشه‌یدی و شونچه مدتده نیچه مرته باش‌پناهلیک ایسته‌گی رد ایتیلگن.
او، حاضرگچه سویدن نینگ کیم‌لیگینی آلمه‌گن و تقدیری معلوم بولیشینی کوته‌دی.
علی بیر مرته کیم‌لیگی یوقلیگی باعث، سویدن پولیسی تامانیدن قولگه آلینگن.
مهاجرلر و باش‌پناه ایزلاوچی‌لر وزیرلیگی سوزلاوچیسی سیدعبدالباسط انصاری نینگ سلام‌وطندارگه ایتیشیچه، اوشبو وزیرلیک ناقانونی مهاجرلیک نینگ آلدینی آلیش اوچون سعی و حرکت قیله‌دی. اونگه کوره، چونکه ناقانونی مهاجرلیک قیین‌چیلیک یره‌ته‌دی.
جناب انصاری نینگ ایتیشیچه، هردایم حکومت اینیسقه مهاجرلر وزیرلیگی مملکت یشاوچیلریدن هیچ بیر شرایط ده ناقانونی مهاجرلیک‌که تن بیرمس‌لرینی طلب قیله‌دی.
مهاجرلیک معلومات مرکزی مصلحتچیسی فریحه جبارخیل نینگ سلام‌وطندارگه ایتیشیچه، افغانستانده اوی آلیش، تیل اورگنیش و ایش و کوچ زمینه‌سی یشاوچیلرگه موجود دیر و باشقه مملکت‌لرده بو زمینه‌لر مهاجرلر اوچون قولی‌لیک قولگه کیلمه‌یدی.
خانم جبارخیل گه کوره، یخشی و رویایی حیات اوچون مملکت نی ترک قیلگن چیت‌ایل مملکت‌لرده کوپینچه قیین‌چیلیک‌لرگه روپه‌ره بولیب و نهایت ده سورگون ایتیله‌دی.
مهاجرلر و باش‌پناه ایزلاوچی‌لر وزیرلیگی مسؤوللری نینگ ایتیشیچه، حاضر افغانستاندن آلتی یریم میلیون مهاجر دنیا مملکت‌لری اینیقسه ایران و پاکستانده حیات کیچیره‌دی.
اولرگه کوره، بو جمله دن کمیده 2 میلیون و 500 مینگی ایران ده، 2 میلیون و 400 مینگی پاکستانده و قالگنی باشقه مملکت‌لرده تیریکچیلیک قیلیشه‌دی.
