ولسمشر اشرف غني نوی ښوونیز کال له دوو ورځو ځنډ وروسته پرانسته.
ولسمشر محمداشرف غني د نوي ښوونیز کال د پیل په مراسمو کې وویل، تراوسه د ښوونې او روزنې کیفیت ته جدي پام نهدی شوی او زموږ پوهنیز نظام باید په اروپا او امریکا کې د ۱۹مې او ۲۰مې پېړیو د ښوونیز نصاب تکرار نه وي.
د غني په وینا، د ښوونځیو تخنیکي ستونزې په راتلونکیو کلونو کې د حل وړ دي، خو د ۲۱مې پېړۍ له شرایطو سره سم باید د زده کړو کیفیت لوړولو لپاره طرحه جوړه شي.
ولسمشر غني وویل، د ښه کیفیت لرونکې زده کړې په هېواد کې د ثبات رامنځته کېدو او د ښه ظرفیت لرونکي بشري ځواک د تولید لامل کېږي.
محمداشرف غني زیاتوي، د ۲۷۰۰ ښوونځیو لپاره د ودانیو جوړولو چارې پیل شوي او د پاتې نورو جوړولو لپاره به په روان کال کې بودیجه ځانګړې شي.
ولسمشر دغه راز په روان کال کې د ۱۱ زرو ښوونکیو د ګومارلو خبر هم ورکړ.
اړوند مطالب:
بادغیس؛ ۵۹زره ماشومان ښوونځي ته نهشي تللی
لوګر کې ۱۰۰ ښوونځيو ته نوې ودانۍ جوړېږي
پکتيا کې د ښوونځيو جوړولو ته خلکو ۷۲ جريبه ځمکه وړيا ورکړې
په همدې حال کې د پوهنې وزارت سرپرست وزیر میرویس بلخي وايي، په یاد وزارت کې پر ظرفیت جوړولو کار روان دی او دغه راز د تشکیلاتو په برخه کې د اصلاحاتو او د زده کړو کیفیت لوړولو په برخه کې هم کار شوی دی.
بلخي وايي، د شهادتنامو برېښنايي کولو پروسه یې پیل کړې او همدارنګه هڅه کوي چې د روان کال په اوږدو کې په دغه وزارت کې سرپرستۍ ته د پای ټکی کېږدي.
دا په داسې حال کې ده چې اوس هم ګڼشمېر ماشومان ښوونځیو ته له تګه محروم دي او زدهکوونکي هم د کتابونو له نه لرلو او له ناامنیو سر ټکوي.
