د ترکیې لومړی وزیر بنعلي یلدریم د یو لوړپوړي پلاوي په مشرۍ افغانستان ته راغلی دی. ښاغلي بنعلي یلدریم له اجرایوي رییس عبدالله سره ګډې خبري غونډه کې د دوه اړخیزو اړیکو په پراختیا، د همکاریو په دوام، له ترهګرۍ سره په ګډې مبارزې، د اقتصادي اړیکو په پراخېدو، د افغان-ترک ښونځیو په څرنګوالي او په ځېنو نورو مسایلو خبرې وکړې.
د ترکیې لومړي وزیر د افغان دولت او پاکستان ترمنځ د اړیکو له ښه کېدو او د سولې په اړه د افغان ولسمشر له وروستیو وړاندیزونو ملاتړ څرګند کړ.
دغهراز اجرایوي رییس عبدالله وویل، کابل ته د ترکیې د لومړي وزیر راتګ موخه د دواړو هېوادونو ترمنځ د پیاوړیو اړیکو دوام دی.
هغه وايي، ترکیې حکومت د روان میلادي کال په مې میاشت کې د یوې درې اړخیزې ناستې لهپاره زمینه برابره کړې او ټاکل شوې، د ګډ اقتصادي کمېسیون غونډه جوړه شي چې د کډوالو او یوشمېر نورو مسایلو په اړه به هم په کې خبرې وشي.
ټاکل شوې د ترکیې لومړی وزیر نن له ولسمشر محمد اشرف غني سره هم لیدنه ولري او د بېلابېلو مسایلو په اړه به خبرې وکړي.
