تخار ولایتی نینگ یشاوچیلریدن بیرقطاری، بوگون کابل‌ده خبری بیر ییغین اوتکزیب حکومت دن مذکور ولایت خوفسیزلیگی توغریسیده جدی شکلده دقت قیلیشی‌نی سوره‌گن.
تخار ولایتی یشاوچیلریدن بیری مونیسه مبارزنینگ ایتیشیچه، مذکور ولایت نینگ ایریم تومن‌لریده ناقانونی قوراللی گروهلرنینگ فعالیتی، ناتینچلیک‌لر کینگه‌یگنی، ریجه‌لنگن جنایی جرم‌لر، آدم اوغیرلاوچیلیک و ترورچیلیک ترماقلرنی تکرارسیز فعالیت‌لری، یشاوچی‌لرنی جدی شکلده خواطرگه سالگن.
خانم مبارزنینگ کوپه‌یتیریشیچه، تخار ولایتی نینگ چاه‌آب و ورسج تومن‌لریده ترورچیلیک ترماقلر کینگه‌یگنی و تخار ولایتی بوییچه مخابراتی ترماقلرنی فعالیتی کیسیلگنی مذکور ولایت طالبان گروهی قولی گه سقوط قیلیشی خصوصیده زمینه یره‌تگن.
بانو مبارز، قندوز و غزنی ولایت‌لریده یوز بیرگن واقعه‌لرگه اشاره قیلیب ایتیشیچه، قوراللی گروهلر مذکور ولایت‌لرنی نظارت گه آلیشیدن آلدین مخابراتی ترماقلرنی کیسگن ایدی و شونینگدیک، تخارده مخابراتی ترماقلرنی فعالیتی کیسیلیشی مذکور ولایت سقوطی اوچون خطر قونغیراغی سنله‌دی.
بیراق، تخار حاکمی سوزلاوچیسی جواد هجری نینگ سلام‌وطندارگه ایتیشیچه، تالقان شهریده جدی امنیتی تهدید یوق دیر و ناتینچلیک تالقان شهری دروازه‌لریده دییلگن ادعالر بی‌اساس دیر.
جناب هجری، مذکور ولایت نینگ 5 تومنیده امنیتی قیین‌چیلیک بولگنینی تَن آله‌دی، بیراق ایتیشیچه، امنیتی کوچلر یوقاری روحیه بیلن طالبان گروهی گه قرشی توریب و مدافعه قیلیش اوچون تیارگرلیک آلگن.
تخار حاکمی سوزلاوچیسی نینگ ایتیشیچه، طالبان گروهی نینگ قیزیل قطعه‌سی اورین باسری و حربی قومندانی ینگی‌لیک‌ده هلاک ایتیلگن و مذکور گروه نینگ الفتح عملیاتی مغلوبیت گه اوچره‌گن.
