تخار ولایتیده ناقانونی قوراللی گروه‌لر آره‌سیده صورت تاپگن آتیشمه نتیجه‌سیده، 3 کیشی هلاک ایتیلیب و باشقه قطار کیشی یره‌لنگن.
ناقانونی کیشی‌لر آلتین کانی ایشلاوچی‌لریدن باج آلیش اوچون حرکت قیلگن بیرحالده، ایشلاوچی‌لرنینگ قرشی‌لیگی بیلن دوچ کیلگن.
تخار ولایتی چاه‌آب تومنی یشاوچی‌لریدن بیری‌نینگ ایتیشیچه، بشیر قانت‌گه تیگیشلی ناقانونی قوراللی کیشی‌لر نورآبه منطقه‌سیده، آلتین کانی اوستیگه هجوم قیلیب و اوشبو کان ایشلاوچی‌لری بیلن توقنشگن‌لر.
چاه‌آب محلی منبع‌لریدن بیری‌نینگ ایتیشیچه، آلتین کانی‌ده آتیشمه یوز بیرگن‌دن سونگ، غلام حسین و فیض‌الله گه تیگیشلی ناقانونی قوراللی کیشی‌لر چاه‌آب بازاریده توقنشگن و نتیجه‌ده بیر پولیس یره‌لنگن.
محل یشاوچی‌لری‌نینگ ایتیشیچه، ناقانونی قوراللی گروه‌لر آره‌سیده صورت تاپگن آتیشمه نتیجه‌سیده، بیرقطار عایله‌لر آواره بولگن.
مذکور تومن مسووللریگه کوره، وضعیت خواطرلنترووچی دیر و اوروش‌نینگ قیته‌دن باشله‌نیشی ممکن.
تخار حاکمی‌نینگ سوزلاوچیسی جواد هجری‌نینگ ایتیشیچه، بو واقعه‌ده ایکی باله جان بیریب و باشقه ایکی باله یره‌لنگن دیر.
جواد هجری گه کوره، مذکور آتیشمه باعث، کوپ قطار کیشی‌لر اوی و جای‌لرینی ترک قیلیش گه مجبور بولگن.
تخار حاکمی‌نینگ سوزلاوچیسی، ناقانونی قوراللی گروه کیم‌لیگی خصوصیده صحبت قیلمه‌یدی؛ بیراق بو آتیشمه‌نی آلتین کانی اوستیگه صورت تاپگنی‌نی تصدیق‌لیدی.
عین‌حالده، تخار محلی حکومتی‌دن بیر منبع‌نینگ ایتیشیچه، اوشبو آتیشمه بشیر قانت و بویوک‌لر کینگشی اعضاسی سناتور افضل‌گه تیگیشلی قوراللی کیشی‌لر آره‌سیده صورت تاپگن.
