اخیرگی وقتلرده تخار بیلیم یورتی نینگ بعضی استادلری همده قطار ملالر دموکراسی تیزیمیگه ضد فتوا صادر قیلیب اهالینی حکومتگه قرشی عصیان کوتاریشگه ترغیب قیلماقدهلر.
اوتگن کون مذکور ولایتده مولوی مبشیر و مولوی سبحانالله ناملی ایکّی دین عالمی بولیب اوتگن ایری – ایری یغینده حکومتگه ضد فتوا صادر قیلیب، اولردن بیری محلی بیر تلویزیوننینگ تصویرچیسینی اهانت قیلدی.
تخار ولایتی مرکزی تالقان شهرینینگ قطار یشاووچیلری، ملالرنی بوندهی موعظهسی حکومت و خلق علاقهسی اورتهسیده سلبی تاثیر قالدیرهدی دیدیلر. باشقه تاماندن بو قبیل موعظهلر قوراللی طالبلر همده باشقه گروهلر تیگیرمانیگه سوو قویهدی دیگن تالقانلیکلر.
سلاموطندارگه صحبت بیرگن تخار خبرچیلر بیرلشمهسی نینگ باشلیغی شفیقالله پویا، محلی تلویزیون صورتچیسینینگ اهانت بولیشی قبول قیلنمهیدیگن بیر مساله دیدی. او، خلق اورتهسیده خبرچیلرگه نسبتن نفرت اویغاتیشگه اولگورگن ملالر قولگه آلینیب محاکمه بولیشی بارهسیده تاکید ایتگن.
تخار حج و اوقاف ریاستی نینگ سوزلاووچیسی مخلص تالقانی، بعضی بیر ملالر دین قدریتلرگه ضد مسجدلر منبریدن اهالینی سوکیب فتنه اویغاته دیلر دیدی.
جناب تالقانی، تخار حج اوقاف ادارهسی مذکور ایکّی ملانینگ بو قبیل سوزلری دین عالملری ییغینیده تیکشیریلهدی دیگن. او، تیزیمگه قرشی تبلغ قیلهدیگن ملالرنی حبسگه آلیب محاکمه قیلیشینی مرکزی حکومتدن سورهگن. جناب تالقانی نینگ سوزلریگه کوره، تخار ولایتیده 4 مینگ مسجد بار فقط 114 مسجد ایسه حج اوقاف وزیرلیگی نینگ نظارتیده فعالیت قیلهدی.
ولایت امنیه قوماندانی فقیر محمد جوزجانی، محلی ملالر همده آقسقاللر بیلن مصلحت بولگن دن سونگ مذکور ملالر حبسگه آلینیشی اوچون قرار آلهمیز دبگن. بو تخار ولایتیده قطار دین عالملرینینگ موجود تیزیمگه قرشی بیلدیرگن بیرینچی فکری ایمس البته. بوندن آلدین هم بعضی بیر ملالر خاتین قیزلرگه اهانت قیلیب، حکومتگه ضد مسالهلرنی تیلگه آلگن ایدی.
