اوتگن نیچه کون جریانیده تخار ولایتیده قوراللی طالبلر 23 مکتب‌نی یاپگن.
سلاموطندارگه صحبت بیرگن تخار ولایتی‌نینگ معارف ریاستی باشلیغی انجنیر سمیع ابدیارنینگ ایتیشیچه، طالبان گروهی تامانیدن تخار ولایتیده معارف باشلیغی قیلیب تعیین ایتیلگن امیرمحمد مزمل قوییب یوباریلمه‌گنی سبب، مذکور گروه بو ولایتده مکتب‌لرنی یاپیب قویگن.
ابدیارنینگ ایتیشیچه، طالبان گروهی 3 مکتب‌نی ینگی‌قلعه تومنیده، 4 مکتب‌نی خواجه بهاوالدین تومنیده، 15 مکتب‌نی درقد تومنیده و باشقه بیر مکتب‌نی خواجه‌غار تومنیده یاپیب قویگن.
ابدیارگه کوره، نمک‌آب تومنی‌نینگ رسمی‌لری هم مکتب‌لرنی یاپیب قوییشی خصوصیده، طالبلر تامانیدن آگاه‌لنتیریلگن.
درقد ولسوالی مولوی سیف‌الدین‌نینگ سلاموطندارگه ایتیشیچه، طالبان گروهی مکتب‌لرنی یاپیب قویگنی‌گه قوشیمچه سیلاولر و کیم‌لیک ترقه‌تیش ایشلاوچیلرینی هم آگاه‌لنتیرگن. اونینگ ایتیشیچه، حکومت مذکور گروه‌نینگ ایسته‌گی اساسیده عمل قیلمه‌گن صورتده، سیلاولر کمیسیونی‌نینگ ایش‌لریگه توسیق بوله‌دی.
بوندن آلدین، تخار حاکمی‌نینگ سوزلاوچیسی سنت‌الله تیمور، ینگی‌قلعه تومنیده 7 مکتب یاپیلیب قوییلگنی‌دن خبر بیرگن ایدی. اونینگ ایتیشیچه، 3 مکتب طالبلر تامانیدن و باشقه 4 مکتب ایسه امنیتی تهدیدلر سبب یاپیلیب قوییلگن.
عین‌حالده، درقد تومنیده سیلاولر ایشلاوچیلریدن بیر کیشی و کیم‌لیک ایشلاوچیلریدن بیرکیشی طالبلر تامانیدن اوغرلنگن.
سلاموطندارگه صحبت بیرگن تخار ولایتی سیلاولر کمیسیونی‌نینگ باشلیغی روح‌الله موسوی‌نینگ ایتیشیچه، طالبلر بوگون "سه‌شنبه" آوازبیرووچیلرنینگ رویخط‌‌گه آلیش ایشلاوچیلریدن بیری‌نینگ موسی‌زی قیشلاغیدن اوغیرله‌گن.
شونینگ‌دیک، درقد ولسوالی مولوی سیف الدین‌نینگ ایتیشیچه، طالبلر بوگون ایرته‌لب کیم‌لیک ترقه‌تیش ایشلاوچیلریدن بیرینی اوزلری بیلن آلیب کیتگن.
اونینگ ایتیشیچه، اوغیرلنگن کیشی‌لرنینگ تقدیری بیللی ایمس دیر.
