تخار ولایتی‌نینگ خواجه‌غار و قندوز ولایتی‌نینگ دشت‌ارچی تومنی آره‌سیده پل‌مؤمن آتلی منطقه‌ده حربی کوچلرنینگ ایگی قرارگاهی طالب‌لرنینگ گروهی هجومی گه دوچ کیلگن و بو هجوم نتیجه‌سیده 30 حربی عسکر هلاک ایتیلگن و باشقه 20 دن آرتیق عسکر یره‌لنگن.
حربی کوچلرنینگ نیچه موتری حربی عسکرلرنینگ جسدلرینی خواجه‌غار تومنیدن تخار ولایتی کسلخانه سیگه انتقال بیریش گه مأمور بولگن.
تخار حاکمی سوزلاوچیسی سنت‌الله تیمورنینگ ایتیشیچه، قوراللی طالبلر مذکور ایکی حربی قرارگاه‌نینگ برچه حربی جهازینی اوزلری بیلن آلیب کیتگن.
آتی فاش ایتیلیشی‌نی ایستمه‌گن پولیس رسمی‌لریدن بیری‌نینگ ایتیشیچه، حاضرگچه 32 جسد کسلخانه گه انتقال بیریلگن؛ عین حالده، حاضرگه‌قدر حربی کوچلرنینگ موترلری عسکرلرنینگ جسدلرینی کسلخانه گه آلیب کیله‌دیلر.
حربی عسکرلرنینگ جسدلریدن توله بولگن بیر موتر ییتیشگنیدن سونگ، عسکرلر و هلاک ایتیلگن‌لرنینگ عایله اعضالرینی آره‌سیده فزیکی تارتیشمه یوز بیرگن.
اوشبو تارتیشمه‌ده بیرقطار کیشی‌لر قتیق شکلده کلتک‌لنگن و نتیجه‌ده حربی عسکرلر اوق آتیب اهالی‌نی ترقاقلشتیرگن.
پل‌مؤمن منطقه‌سیده یوز بیرگن واقعه‌ده قربان بولگن‌لرنینگ عایله اعضالرینی ایتیشیچه، حربی عسکرلر مسؤوللرنینگ دقت‌سیزلیگی باعث، 8 ساعت اوروش‌دن سونگ، طالبلر تامانیدن اولدیریلگن.
اولرنینگ ایتیشیچه، طالبلر بیلن تینچلیک‌نی بهانه قیلیب، بیزلرنینگ فرزندلریمیزنی اولدیره‌دیلر.
تخار ولایتی کسلخانه‌سی و حربی کوچلرنینگ مسؤوللری، هلاک ایتیلگن‌لرنینگ دقیق رقمی‌نی میدیالردن یاشیریش اوچون سعی و حرکت قیله‌دیلر؛ بیراق تخار حاکمی سوزلاوچیسی سنت‌الله تیمورنینگ ایتیشیچه، دستلبکی گزارش‌لر اساسیده، یوز بیرگن واقعه‌ده 30 عسکر هلاک و باشقه 20 دن آرتیق عسکر یره‌لنگن. جناب تیمورگه کوره، یره‌لنگن‌لرنینگ احوالی آغیر دیر.
تخار ولایتی‌نینگ پولیس قومندانی عبدالرحمان آقتاش نینگ ایتیشیچه، حربی خاص کوچلری قوراللی طالب‌لرنینگ قتغن قیلیش اوچون تیارگرلیک آله‌دیلر.
اونینگ ایتیشیچه، قوراللی طالب‌لرنینگ آلدی آلینمه‌گن صورتده، خواجه‌غار تومنی سقوط قیلیشی ممکن.
عین حالده، تخار ولایتی‌نینگ حکومتی رسمی‌لریدن بیری گزارش‌ده آتی فاش ایتیلیشی‌نی ایستمه‌ی ایتیشیچه، درقد، ینگی‌قلعه و دشت‌قلعه تومن‌لری سقوط خطری گه روپه‌ره بولیب تورگن.
شونینگدیک، تخار حاکمی سوزلاوچیسی‌نینگ ایتیشیچه، بو ولایت گه ییترلیچه کوچ یوباریلمه‌گن صورتده، نیچه تومن طالب‌لرنینگ قولی گه سقوط قیلیشی ممکن.
