چهارشنبه‌دن پنج‌شنبه گه اوتر کیچه تخار ولایتی‌نینگ خواجه‌غار تومنی قندهاریلر قیشلاغیده جایلشگن محلی پولیس عسکرلریدن 8 ته‌سی طالب‌لر آرقه‌لی اولدیریلگن و اوندن سونگ، جسدلری اوتگه تارتیلگن.
سلام‌وطندارگه صحبت بیرگن تخار ولایت کینگشی اعضاسی محمداعظم افضلی‌نینگ ایتیشیچه، مذکور پوسته‌نینگ عسکرلریدن بیری طالب‌لر بیلن همکار ایکن و او طالب‌لر بیلن بیرگه قاچیب کیتگن.
خواجه‌غار تومنی‌نینگ کوپینچه‌سی منطقه‌سی طالب‌لرنینگ نظارتی‌ده دیر. یالغیز تومن مرکزی و مرکزگه یقین نیچه قیشلاق امنیتی کوچلرنینگ اختیاریده قالگن.
تخار پولیس قومندانلیگی‌نی سوزلاوچیسی خلیل اسیرنینگ ایتیشیچه، خواجه‌غار تومنیده طالب‌لرگه قرشی حربی عملیات تیزلیک‌که یولگه قوییله‌دی.
قوراللی طالب‌لر حاضرگچه بو توغریده هیچ نرسه دیمه‌گن.
خواجه‌غار و دشت‌قلعه تومن‌لریده قوراللی طالب‌لرنینگ فعالیتی کینگه‌یگنی سبب، سونگی کونلرده یوزلرچه عایله اوی و جایلرینی ترک قیلیش‌گه مجبور بولگن‌لر. شونینگدیک، ایکی کون آلدین، حربی کوچلری‌نینگ اعلان قیلیشیچه، دشت‌قلعه تومنیده طالب‌لرگه قرشی حربی عملیات یولگه قوییلگن و بو تومن بوتونله‌ی طالب‌لردن تازه‌لنگونگه‌قدر دوام ایتیشی ممکن.
