تخار کې د حکومت سیمهییزې ادارې د ښاري شورا په نوم د پخوانیو جهادي قومندانانو په ګډون، یوه شورا جوړه کړې او ترې غوښتي یې دي چې د امنیت په ټینګښت کې ورسره مرسته وکړي.
په تخار کې د حکومت د سیمهییزې ادارې یوه چارواکي د نوم نه خپرولو په شرط سلاموطندار ته وویل چې د تالقانو ښار پر څو حوزو وېشل شوی او د دغو حوزو د امنیت ټینګښت مسوولیت پخوانیو جهادي قومندانانو ته سپارل شوی دی.
د دې سرچینې په وینا، هغه کسان چې وسلې اخلي، د ملي امنیت له لوري به یې ملاتړ کېږي.
د خواجهغار، بهارک او نمکآب پر ولسوالیو د طالبانو له بریدونو سره سم یوشمېر پخوانیو جهادي قومندانانو تر خپلې قوماندې لاندې کسانو ته وسلې په لاس ورکړي او بهارک ولسوالي ته یې د جګړې لومړۍ کرښې ته لېږلي دي.
د ولسي پاڅونوالو یو قومندان نجیب وايي، د تخار سیمهییزې ادارې له جهادي قومندانانو او د ولایتي شورا له غړیو غوښتي چې وسلې واخلي او د طالبانو پروړاندې ودرېږي.
د هغه په خبره، سره له دې چې د طالبانو درانه بریدونه په بهارک ولسوالي کې د ولسي پاڅونوالو له لوري پر شا تمبول شوي، خو اړتیا ده چې امنیتي ځواکونه پراخ عملیات وکړي، څو د تالقانو پر ښار د ګواښونو مخه ونیسي.
قومندان نجیب زیاتوي چې د تخار پخواني امنیه قومندان حاجي اغاګل، قومندان اغايي، قومندان داوود، حاجي کریمالله او اربابولي د سیمهییزې ادارې په غوښتنه وسلې اخیستې او له خپلو کسانو سره د بهارک ولسوالي په بېلابېلو برخو کې ځای پرځای شوي دي.
په همدې حال کې د تخار د والي ویاند جواد هجري وايي، جهادي قومندانان د طالبانو پروړاندې مبارزه کې ګټور تمامېږي او حکومت د همدې لپاره ترې کار اخلي. د نوموړي په وینا، د دغه ولایت په بهارک ولسوالي کې د طالبانو عملیات د امنیتي ځواکونو په ملاتړ د جهادي قومندانانو له لوري پر شا تمبول شوي دي.
هجري زیاتوي، حکومت هڅه کوي چې د ولسي ځواکونو فعالیت قانوني کړي او له هغوی نه د ترهګرۍ پروړاندې مبارزه کې کار واخلي.
خو د تالقانو ښار مشورتي مرستیال بصیر بېک بیا باور لري چې نامسووله وسلهوال به په راتلونکي کې د خلکو او ځايي ادارې لپاره په سرخوږي بدل شي.
د نوموړي په وینا، حکومت مخکې هم د کوکچې سیند غاړو ته په پرتو ولسوالیو کې د نامسووله وسلهوالو ملاتړ کړی و چې اوس په ځینو مواردو کې له طالبانو هم ناوړه چلن کوي.
بېک زیاتوي، حکومت پهدې سره د خلکو روحیه کمزورې کوي او کومو کسانو ته یې چې وسلې ورکړي، مخکې د خلکو پر اوږو سپاره وو او ظلمونه یې پرې کړي؛ نو حکومت ته پهکار ده چې د دغه کار مخه ونیسي.
د تخار یوشمېر اوسېدونکي هم وايي چې حکومت باید د پخوانیو جهادي قومندانانو له لارې نه، بلکې د امنیتي ځواکونو په وسیله د طالبانو د بریدونه مخه ونیسي.
