تحلیلچی‌لرگه کوره، ایریم حادثه‌لر تیکشیریلیشی اوچون جمهور رییس‌غنی تامانیدن ایجاد ایتیله‌دیگن حقیقت‌نی تاپیش کمیسیون‌لر عاموی خلق فکرینی قانقیتیریش اوچون دیر و عمل‌ده هیچ بیر ایش قیلمدی.
هنوزگچه مملکت‌ده یوز بیرگن قطار واقعه‌لرنی تیکشیریش اوچون افغانستان جمهور رییسی تامانیدن حقیقت‌نی تاپیش اوچون ایریم کمیسیون‌لر ایجاد ایتگن، لیکن اوشبو کمیسیون‌لرنینگ قیلگن ایشی هنوز بیللی ایمس.
قورال‌لی طالب‌لر 14 ییلدن کیین بوندن اون ایکی کون آلدین مملکت شمال شرقی‌ده جایلشگن قندوز شهرینی تصرف قیلیش‌گه موفق بولدی. شونینگ‌دیک حادثه هر تامانلمه تیکشیریلیشی و پرده آرتیده کیم‌نینگ مساله اوچون قولی بارلیگینی انیقلش اوچون مملکت سابق ملی امنیت رییسی امرالله صالح وسابق معارف وزیری فاروق وردک باشچیلیگی‌ده هیات تعین قیلدی.
عین حالده، مذکور کمیسیون بجرگن ایش اوچون تحلیلچی‌لرنینگ فرقلی قره‌شلری بار.
حربی تحلیلچی عتیق‌الله امرخیل‌نینگ قندوز حادثه‌سی تیکشیریلشی اوچون تشکیل ایتیلگن کمیسیون توغریسیده ایتیشیچه، حادثه‌لرگه قرشی کوره‌شیش اداره موجود بولگن حالده، حقیقت‌نی تیکشیریش اوچون هیچ قنده‌ی کمیسیون تشکیل ایتیلیشی‌گه احتیاج یوق. جناب امرخیل‌نینگ سلام‌وطندارگه ایتیشیچه، حادثه‌لرگه قرشی کوره‌شیش دولت چهار چوبه‌سیده تشکیل ایتیلگن کمیته شو قبیل حادثه‌لرنی تیکشیریش اوچون ییترلی دیر.
مذکور حربی تحلیلچی‌گه‌کوره، افغانستانده کمیسیونلرنی تشکیل ایتیلیشی نینگ کوپراق بویورتمه جنبه‌سی بار و هیچ قنده‌ی یوتوققه ایگه ایمس. او، حکومت هر بیر حادثه اوچون کمیسیون تشکیل ایتگن دن کوره حادثه‌لرگه قرشی کوره‌شیش اداره اوچون جدی اعتبار قره‌تیشی لازم لیگی باره‌سیده تاکیدله‌گن
نماینده‌لر مجلسی نینگ اعضالریدن همده بیلیم یورت استادی سیدقیوم سجادی‌نینگ کمیسیون ایجاد ایتیلگنی توغریسیده ایتیشیچه، جمهور رییس تامانیدن هنوزگچه مملکت‌ده یوز بیرگن ایریم واقعه‌لر تیکشیریلیشی اوچون تشکیل قیلگن کمیسیون حادثه‌لر تیکشیریلیشی اوچون معین معیارلر اساسیده ایش قیلمه‌گن و بونده‌ی معیارلرنی بولمه‌گنی تیکشیروولر اوزی‌گه سلیقه‌وی توس آله‌دی.
سجادی‌نینگ تاکیدله‌شیچه، کوپینچه کمیسیون عاموی خلق فکرینی قناعت‌لنتیریش اوچون ایش قیله‌دی لیکن علمده ایش قیلمه‌گن. او، حادثه‌لر اینیقسه قندوز واقعه‌سی عامل‌لری تانیلیشی اوچون تیزیم‌ده معمابارلیگینی تیل‌گه آلیب ایتیشیچه، حکومت بونده‌ی حادثه‌لر ایلدیزدن تانیلیشی اوچون بو قبیل کمیسیونلرنی تشکیل بیریش‌گه احتیاج یوق دیر.
اما، جمهور رییس‌لیک سرایی ایشلری بوییچه سیاسی علاقه‌لر اداره‌سی رییسی میاگل وثیق، قندوز واقعه‌سی تیکشیریلیشی اوچون مخصوص کمیسیون ایجاد ایتیلیشی اوچون ضرروت بارلیگینی ایتگن. جناب وثیق‌نینگ سلام‌وطندارگه ایتیشیچه، قندوز واقعه‌سینی هرتامانلمه تیکشیریش بیر اداره‌نینگ قدرتیدن تشقری دیر.
بوندن بیش آی آلدین میدان وردک ولایتی‌نینگ جلریز ولسول‌لیگی‌ده قورال‌لی طالب‌لرنینگ هجومی نتیجه‌سی عاقبتی‌ده 22 حربی عسکر هلاک بولگن ایدی و کابل نینگ شاه‌شهید منطقه‌سیده صادر ایتیلگن هجومده 400 انسان هلاک بولگن ایدی، اوشبو حادثه‌لر عاملی پیدا بولیشی اوچون هم جمهور رییس مخصوص کمیسیونلرنی ایجاد قیلگن ایدی، بیراق هنوزگچه هم اوشبو کمیسیون‌لرنینگ قیسی ساحه‌ده ونیمه ایش قیلگنی انیق ایمس.
