افغانستان بوییچه بیرلشگن ملتلر تشکیلاتینینگ خاص نمایندهسی تادامیچی یاماموتو، اوتگن کیچه بیرلشگن ملتلر تشکیلاتی نینگ خوفسیزلیک کینگشی ییغینیده، افغانستان جمهورلیک ریاست سیلاوی نینگ نامزدلری و طرفدارلریدن جمهورلیک ریاست سیلاوی نینگ نتیجهسینی قبول قیلیشلرینی سورهدی.
شونینگدیک، جناب یاماموتو، افغانستان جمهورلیک ریاست سیلاویده دخیل بوتون تامانلردن سیلاو ادارهلری گه مسؤولیتلرینی بوتونلهی عملگه آشیریشی و بوتون سیلاو شکایتلری قانونی ادارهلر آرقهلی تیکشیریلیشی گه رخصت بیریشلرینی طلب قیلگن.
اونینگ کوپهیتیریشیچه، بوتون سیلاو شکایتلری قانونی شکلده تیکشیریلگنیدن سونگ، افغانستان جمهورلیک ریاست سیلاوی نینگ نامزدلری و اولرنینگ طرفدارلری سیلاو نتیجهسینی قبول قیلیشلری کیرهک.
عین دمده، یاماموتونینگ افغانستان تینچلیگی توغریسیده ایتیشیچه، تینچلیک جریانی افغانستان حکومتی تامانیدن رهبرلیک قیلینیب و دنیا جماعهچیلیگی بو توغریده افغانستان گه یاردم بیریشی لازم.
یاماموتوگه کوره، جمهورلیک ریاست سیلاوی نینگ نتیجهسی هر نرسه بولگنده، تینچلیک بو مملکت نینگ کیلهجک حکومتی اوچون اینگ اونملی مسئله دیر و افغانستانده کیلهجک حکومت نینگ مسؤولیتی تینچلیک تأمینلش، رواجلنتیریشنی یرهتیش، کمبغللیکنی کمهیتیریش، انسان حقوقیدن حمایت قیلیش و جواب بیریش دیر.
افغانستان جمهورلیک ریاست سیلاوی، جاری ییل، 6- میزان ده یولگه قوییلدی و بو سیلاونینگ دستلبکی نتیجهسی 27- میزان ده اعلان ایتیلیشی خصوصیده قرار قیلینگن ایدی، بیراق سیلاو ایرکین کمیسیونی حاضرگهقدر سیلاو نتیجهسینی اعلان قیله آلمهگن.
