بیرلشگن ملتلر تشکیلاتی امنیت کینگشی، اسلامی دولت گروهی (داعش) گه قرشی کورهشیش خصوصیده، فرانسه تکلیف قیلگن شرطنامهنی تصدیقلهدی.
اوشبو شرطنامه اوتکن (جمعه کون)، آلدینگی هفته فرانسه پایتختی پاریسده یوزبیرگن قانلی هجوملردن بیرهفته اوتگنیدن کیین تصدیقلندی. بو هجوملرده پاریس شهرینی کمیده 7 منطقهسی هدفگه آلیندی، نتیجهده 130 کیشی هلاک بولیب و باشقه 350 کیشی یرهلندی.
بو شرطنامهده برچه کوچلی مملکتلر داعش گروهیگه قرشی کورهشیشی و مذکور گروه هجوملری باشقریلیشی خصوصیده سعی و حرکت قیلیشلرینی سورهگن.
شونینگدیک اوشبو شرطنامهده، داعش گروهی دنیا امنیتی و تینچلیگیگه قرشی «تکرارسیز تهدید» دییلگن.
عین حالده، سیاسی ایش بیلرمانلردن بیرقطاری، اوشبو شرطنامه تصدیقلهنیشینی عملی شکلده تروریستی گروهلر بیلن کورهشیب کیلهیاتگن مملکتلر منفعتیگه دیب بیلهدی. اولرنینگ ایشانچیگه کوره، مذکور مملکتلر بو فرصتدن یخشی صورتده فایدهلنیشی کیرهک.
سیاسی ایش بیلرمان محمد ناطقینینگ بوتوغریده سلاموطندارگه ایتیشیچه، بو شرطنامه دنیا امنیتی تأمینلنیشی خصوصیده اونوملی دیر؛ بیراق بو تشکیلات حاضرگچه تروریستی گروهلرگه قرشی بیردیک حرکت قیلمهگن و سونگی شرطنامهده هم مذکور گروهلر بیلن سیلهنیلگندیک حرکت قیلگن.
جناب ناطقینینگ ایتیشیچه، بیرلشگن ملتلر امنیت کینگشی، تروریسمنی برچه تروریستی گروهلرنی اوز ایچیده آلهدیگن بسته یا جریان کبی تعریف قیلیب و باشقه تاماندن، اوشبو گروهلرنی فکری جریانلریگه قرشی کورهشیب و دنیادن تروریستی گروهلر اساسی شکلده نابود ایتیلیشی لازم.
جناب ناطقی، بو شرطنامهنی داعش گروهیگه قرشی جهانی بیرلشمه بیلیب ایتیشیچه، اوشبو شرطنامه اساسیده داعش گروهیگه جدی زیان ییتکیزیلهدی و یقین کیلهجکده بو گروه نابود ایتیلهدی.
بیراق، حربی ایش بیلرمان عتیقالله امرخیل، بیرلشگن ملتلر امنیت کینگشینینگ، اوشبو شرطنامهسینی سیاسی بیلیب ایتیشیچه، امنیت کینگشی سمبولیک شکلده حرکت قیلهدی و بو شرطنامه ترویستی گروهلرگه توسیق بولهآلمهیدی؛ چونکه تروریستی گروهلر کوچلی مملکتلر تامانیدن حمایه بولهدی.
جناب امرخیلنینگ ایشانچیگه کوره، حاضرگچه تروریستی گروه لرگه قرشی بیرلیک تشکیل ایتیلمهگن و کوپینچه مملکتلر اوز منفعتلری اوچون تروریستی گروهلردن فایدهلنهدی.
امرخیل گه کوره، تروریستی گروهلردن قورقهدیگن مملکتلر، اولرگه قرشی کورهشیشنی باشلهگن؛ بیراق، بو گروهلر کوچلی مملکتلر تامانیدن حمایه بولهدی و حاضر اولرنی یوقاتیب بولمهیدی.
شونینگدیک اوشبو حربی ایش بیلرمان، اوتکن هفته پاریسده یوزبیرگن قانلی هجوملرنی مذکور مملکت ناتو دن اوزاقلیگی بیلیب و کوپهیتیریشیچه، بو واقعهگه بیر قطار مملکتلرنی قولی بار.
