یقینده ناتو باش کاتبی لندنده بریتانیا باش وزیری بیلن اوچرهشیب افغانستانده ناتو حربیلری سانینینگ آشیریلیشی بارهسیده بحثلشگن. ناتو باش کاتبینینگ تأکیدلشیچه مذکور تشکیلات افغانستانده ناتو حربی کوچلری سانی آشیریلیشی بارهسیده ناتوگه اعضا دولتلر بیلن مذاکرهلر آلیب باره یاتگنینی بیلدیرگن.
اوشبو تشکیلات کونی کیچه اوز اعضالریگه یوزلنیب افغانستانگه قوشیمچه حربیلر جونهتیشلرینی سورهگن. امریکا و ناتونی آسترالیا دولتیگه هم افغانلر یورتیگه ینگی حربی کوچلر سفربر ایتیشینی سورهب مراجعت ایتگنی ایتیلهدی. استرالیا باش وزیری مسئلهنی حکومت بلند مرتبهلی عملدارلری اورگنه یاتگنی بارهسیده معلوم بیرگن. ناتونینگ یقین کیلهجکده افغانستان وضعیتینی نظارت قیلیش اوچون بو مملکتگه قوشیمچه حربیلر جونهتیشی احتمالی کوچلی.
امریکانینگ افغانستاندهگی قوماندانی رسمی واشنگتندن بو مملکتگه قوشیمچه حربی کوچلر سفربر ایتیشینی سورهب مراجعت قیلگن ایدی و شوکیچه کونلرده ترامپ مأموریتینی بو بارهده باش قاتیره یاتگنی ایتیلهدی. امریکا دولتینی یقین کیلهجکده افغانستانگه کمیده اوچ مینگ کیشیلیک قوشیمچه حربیلر جونهتیشی کوتیلهدی. عین حالده امریکا هوا کوچلرینینگ 82 قسمیدن 1500 کیشی حربیلرینی افغانستان ایچکریسیگه جایلشتریلیشی معلوم قیلیندی. فاکس نیوزنینگ معلوم قیلیشیچه مذکور کوچلر افغانستانگه سفربر ایتیلهدیگن ینگی قوشیمچه حربیلر ترکیبیگه کیرمهیدی. اوشبو کوچلر ترورچیلرگه ضربه بیریش مقصدیده اولرنینگ قرارگاهلری و مهم مرکزلری همده مهم رهبرلری و قوماندانی نی نشانگه آلیب نابود ایتهدی. امریکا هواچلری نینگ 82 قسمیگه قرهشلی اوچ یوزکیشی حربیلرینی بوندن آلدین افغانستانده موجود بولگنی ایتیلهدی.
افغانستان وضعیتی یامانلشهدی
امریکانینگ استخبارات ادارهسی CIA باشلیغیدن کوتس یقینده امریکا حربی کوچلری سانی آشیریلیشیگه قرهمهی 2018 ییلده مملکتنینگ سیاسی و امنیتی احوالی یامانلشیشی ممکنلیگی بارهسیده بشارت بیرگن. او امریکا سنا مجلسینینگ اطلاعات کمیتهسی اعضالری حضوریده قیلگن چیقیشیده 2018 ییلگه چه افغانستان نینگ اطراف حدودلریده طالبلر فعالیتی میزانی آشیب مملکت اقتصادی احوالی یامانلشیشی احتمالی بارلیگی توغریسیده فکر بیلدیرگن. دن کوتس تورلی عامللر جملهدن افغانستان حربی کوچلری آرهسیده تلفاتلر میزانی آشیب باریشی، طالبلر حملهلری کوچلنگنی، افغان حربیلرینی اردو و پولیس صفلرینی ترک ایته یاتکنی همده افغانستان حربی کوچلری ارگانلریده فساد بارلیگینی مملکتده امنیتی وضعیتنی یامانلشیشیگه سبب بولهدیگن عامللردن ایکنینی تأکیدلهگن.
کونی کیچه امریکانینگ افغانستان بوییچه تفتیش ادارهسی "سیگار" مملکت امنیتی ارگانلریده فساد اوج آلگنی توغریسیده تشویش بیلدیرگن ایدی؛ مذکور اداره افغانستان جنراللرینی مملکتنینگ اینگ فاسد شخصلری ایکنلیکلرینی ادعا قیلگن.
ناتو و امریکانینگ افغانستاندهگی رسمیلری مملکت اهالیسینینگ 62 % و 57حدودی دولت نظارتی ده بولگنینی ایته دیلر. امریکا و ناتو بلند مرتبهلی رسمیلری فکریچه افغانستاننینگ باشقه حدودلریده عصیانچی گروهلر حضوری دولت حاکمیتینی بوتون مملکتده تأمین ایتیلیشیگه مانع بولماقده. امریکا دولتینی شو کیچه کونلرده افغانستانگه قوشیمچه حربی کوچلر سفر ایتیشی بارهسیده تکلیف ایتیلگن لایحهنی محاکمه ایته یاتگنی ایتیلهدی.
امریکانینگ افغانستاندهگی حربی قوماندانلری ایستکلری انابت گه آلینگن تقدیرده یوزلب کیشی قوشیمچه کوچلرنی افغانستانگه جونه تیلیشیدن علاوه ناتو و امریکا هوا کوچلری مملکتده طالبلرگه هوادن ضربهلر بیریش صلاحیتیگه هم ایگه بولهدیلر. اوشبو لایحه امریکا جمهور رییسی دونالد ترامپ تامانیدن معقوللنگنیدن سونگ عملگه آشیریلهدی.
دونالد ترامپ می آیینینگ ییگیرمه بیشینچی کونی ناتوگه اعضا دولتلر ییغیده اشتراک ایتهدی. امریکا رهبرینی مذکور سنهگه قدر افغانستان بارهسیده اوز استراتیژیسینی اعلان ایتیشی کوتیلهدی.
داعش، طالبان و باشقه ترورچی گروهلرنی نابود ایتیش دونالد ترامپ مأموریتی اوچون بیرینچی اورینده توره دیگن مهم برنامهلردن ایکنی نظرگه آلینگن حالده ترامپنی افغانستانده ناتو و امریکا کوچلری سانی نینگ آشیریلیشی همده ترورچی گروهلرگه قرشی حربی عملیاتلر تیزلشیشی بارهسیده بویروغ بیریشی ممکن.
افغانستان حربی کوچلری وضعیتی
مملکت ملی مدافعه وزیرلیگی بلند مرتبهلی رسمیلری، ناتو و امریکا حربی کوچلری سانی آشیریلیشینی خوش قرشیلهگن حالده مذکور دولتلردن افغان امنیتی کوچلری قابلیتینی آشیریب اوشبو کوچلرنی زمانوی قورال-اسلحهلر بیلن جهازلنتیریشلرینی سورهیدیلر.
2014 ییلی ناتو و امریکا حربی کوچلرینینگ کته قسمی افغانستاننی ترک ایتگنیدن سونگ مملکتنی حمایت ایتیش همده ترورچی گروهلر اینیقسه طالبلرگه قرشی کورهش مسوولیتی افغان حربیلری ییلکه سیگه یوکله تیلگن ایدی.
در واقع اوچ ییلدن بیری افغان حربیلری جنگری گروهلرگه قرشی اوروشیب اوز قابلیتلرینی سینب کورماقدهلر. اکثر حاللرده افغانستان امنیتی کوچلری شهرلر و ایریم منطقهلرنی طالب جنگریلر حملهلری برابریده حمایت ایتیشلیککه مؤفق بولگنلر. اما تورلی عامللر سبب مملکت ملی کوچلری اوشبو آغیر مسوولیت عهدهسیدن چیقه آلیشلری مشکل؛ بیر تاماندن اوشبو کوچلر ییترلی زمانوی قورال اسلحهلر، اوق داری و باشقه حربی تخنیکلر بیلن جهازلنمهگنلر.
ایریم حاللرده جنگ جبههلریده فعالیت آلیب بارهدیگن افغان حربیلرنی لازم آذیق آوقت و لوژستیک امکانلری بیلن تأمینلنمه یاتگنلیکلری بارهسیده شکایتلر موجود.
افغان هوا کوچلرینی هلی لازم اندازه ده زمانوی حربی اوچاقلر بیلن تأمینلنمه گنی هم جنگ میدانلریده افغان ملی کوچلرینی تورلی قیینچیلیکلر بیلن روبهرو قیلماقده. اردو و پولیس ارگانلریده فساد بارلیگی هم اوشبو کوچلرنینگ حربی قابلیتیگه سلبی تأثیر اوتکزگن.
افغانستان دولتی رهبریتی اوچون مملکت حربی کوچلرینی حقیقی معناده بیر ملی کوچگه ایلنتیریش همده مذکور کوچلر قابلیتینی آشیریش توغریسیده مسوولیت حس ایتیب عمل قیلیشلری کیرهک. جاری ییل و کیلهسی ییل ینه بیر بار افغان حربی کوچلری قابلیتینی سینش اوچون مهم ییللر حسابلنهدی.
دولت رهبریتی افغان حربی کوچلرینی زمانوی قورال – اسلحهلر بیلن جهازلنتیریش اوچون دونر دولتلر حمایتینی جلب ایتیشلری لازم
