شفافیت اداره‌سی مسؤوللری‌نینگ ینگی ترقه‌تگن گزارشی‌ده، «خلق ارا بودجه اشتراکی‌ده 2017- ییل آچیق بودجه» تیکشیرووینی کورسه‌تیشیچه، بودجه جریانیده اهالی اشتراکی اوچون دولت تامانیدن تیارلنگن فرصت‌لردن افغانستان 100 دن 15 امتیاز قولگه کیریتگن.
بوگون کابل‌ده خبری بیر ییغین اوتکزگن افغانستان شفافیت اداره‌سی، 2017- ییل آچیق بودجه گزارشی‌نی مالیه وزیرلیگی، نماینده‌لر کینگشی‌نینگ مالی و بودجه کمیسیونی و تیکشیروو عالی اداره‌سی مسؤوللری حضوریده نشر قیلدی.
بودجه جریانیده اهالی اشتراکی کمه‌یگنیدن خواطر بیلدیرگن شفافیت اداره‌سی اجراییه باشلیغی سیداکرام افضلی‌نینگ ایتیشیچه، 2015- ییل‌ده اوتکزیلگن تیکشیرووده افغانستان اهالیسی‌نینگ امتیازی 27 ایکن.
بیراق، جناب افضلی‌گه کوره، آچیق بودجه تیکشیروو نتیجه‌سی اساسیده، شفافیت بولیمی‌ده افغانستان‌نینگ آچیق بودجه امتیازی 2015- ییل‌ده 42 ایکن و میلادی 2017- ییل‌ده 49 امتیازگه کوپه‌یگن و بودجه‌دن نظارت قیلیش بولیمی‌ده 100 دن 43 امتیاز قولگه کیریتگن.
.png)
شونینگ‌دیک، اوشبو ییغینده نطق سوزله‌گن مالیه وزیرلیگی‌نینگ مالی اورین باسری محمدخالد پاینده‌نینگ ایتیشیچه، کیله‌جک مالی ییل اوچون بودجه توزه‌تیش بولیمی‌ده اهالی اشتراکی کوپه‌یتیریلیشی مذکور وزیرلیک‌نینگ اساسی برنامه‌لریدن بیری دیر.
خلق ارا بودجه اشتراکی‌ده 2017- ییل آچیق بودجه تیکشیرووی شفافیت و اشتراک‌نی تیکشیریشی‌گه قوشیمچه، نظارت اداره‌لری جمله‌دن تیکشیروو و قانون توزه‌تیش قوه‌نی هم تیکشیروودن اوتکزگن. افغانستان قانون توزه‌تیش قوه‌سی، تطبیقات جریانیدن نظارت قیلیش بولیمی‌ده 47 امتیاز، بودجه تیارلنیشی خصوصیده، یالغیز 19 امتیاز و تیکشیروو عالی اداره بولیمی‌ده 67 امتیاز قولگه کیریتگن.
آچیق بودجه‌نی تیکشیریش جریان میلادی 2006- ییل‌ده یولگه قوییلگن و بو جریان شفافیت، نظارت و عامه‌وی بودجه‌ده اهالی اشتراکی‌نی تیکشیره‌دیگن بیرینچی خلق ارا جریان سنله‌دی. افغانستان میلادی 2008- ییلدن بویان خلق ارا بودجه اشتراکی نظارتی‌ده بولگن.
