بلخ ولایتی نینگ سرپرستی عطامحمدنور بیلن مملکت جمهور رییسی محمد اشرفغنی ارا کیلیشیلگن لیگی توغریسیده میش – میشلر پیدا بولگندن کیین، عطا ولایتنی تَرک قیلیب کیتیشی آرتیدن بلخ ولایتی نینگ بیر قنچه یشاووچیلری ولایتده نابرقرارلیک آشیشیدن خواطر بیلدیرگنلر.
اولر، حاضرگی شرایطده بلخ جغرافیهسی امنیتی اوچون فقط جناب نور یا – ده اونینگ فکرداشی مناسب تنلاو دیگنلر.
ولایت خلقی، بلخ نینگ حقیقی خذمتگاری جناب نور ولایتدن کیتیشیدن ناراضلر.
اهالی خواطرلرینی اورینلی دیگن بلخ ولایتی نینگ محلی مسووللری، جناب نوردن سونگ ایریم تیورهکلر ولایتنی بولیش اوچون سعی وحرکت آلیب باریشلری امکاندن اوزاق ایمس دیگنلر.
بلخ ولایتی اورین باسرلیگی نینگ سرپرستی فیاض مهر آیین نینگ سلاموطندارگه ایتیشیچه، شمالنی بولیش مسالهسی آسان موضوع ایمس، هر حالده جناب نور کیتیشی بیلن معین قوللر بو توغریده فعالیت قیلیشینی هم رد قیلیب بولمیدی.
بلخ ولایتی نینگ خوفسیزلیگی و نابرقرارلیگی مرکزی حکومتنی جدی قیینچیلیک حتی سقوطگه روپه ره قیلیشی کوتیلهدی.
عطا محمد نورنینگ مملکت ییریک سیاستی اوچون اوزیگه اورین تاپگنلیگی خصوصیده خشوبینلیک کورستگن بیر قنچه مدنی فعاللر، جناب نور ولایتنی تَرک قیلیشی بیلن مزار شریف هیچ زمان کته قیینچلیککه روپه ره بولمیدی دیگنلر.
بخللیک مدنی فعال میر روهین، جناب نور نینگ بلخدن کیتیشی طبیعی بیر گپ و اوندن سونگ ولایت نینگ وضعیتی بوزیلیشی ممکن ایمس لیگینی تیلگه آلگن. اونینگ تعبیریچه، بعضی بیر معین گروهلر ولایت والیسی کیتیشی بیلن امنیت بوزیلیشی توغریسیده میش – میشلرنی یولگه تشگنلر. مدنی جماعهچیلیک نینگ بو فعالی جناب نور کیتیشی بیلن بلخ وضعیتی یخشی لنهدی دیگن.
ولایت سرپرستینی موفق مدیر دیگن بلخ ولایتی نینگ یشاووچیلری، جناب نورنی ترقیات آستقورمه، تجارت و باشقه بولیملرده کتّه موفقیتلرگه نصیب بولگنی حقیده تاکیدلهگنلر.
