په بلخ ولایت کې د ناامنیو، جنایي جرمونو او وسلهوالو غلاوو له زیاتېدو سره په دې ولایت کې سیمهيیز چارواکي د پولیسو د تشکېلاتو له زیاتېدو خبر ورکوي.
د بلخ والي محمد اسحاق رهګذر وايي، د دې ولایت د پولیسو تشکیل تر درې زرو کسانو رسېږي چې دا شمېر د بلخ ولایت د امنیت ټینګښت لپاره بسنه نه کوي.
رهګذر زیاتوي چې دې ولایت ته د کورنیو چارو وزیر په خپل سفر کې ژمنه کړې چې د لسو امنیتي حوزو ترڅنګ شپږ نورې حوزې هم ور زیاتوي.
په ورته وخت کې د مزار شریف اوسېدونکي د ناامنیو او جنايي جرمونو له زیاتېدو په اندېښنې سره امنیتي چارواکي په کم کارۍ تورنوي.
دوی وايي، که چارواکي د دې بېبندوبارۍ مخه ونه نیسي د دې ولایت امنیتي وضعیت به نور هم خراب شي.
د ښار دننه د نامسووله وسلهوالو حضور، په پټه کې قتلونه کول او وسلهوالې غلاوې هغه موارد دي چې په دې ورستیو څو میاشتو کې یې د بلخ اوسېدونکي ډېر اندېښمن کړي دي.
