بلخ ده تیمیرچیلیک صناعتی بیر زمانلرده خاص شکلده رواجلنگن ایدی و حاضر نابودلیککه روپهره بولگن.
تیمیرچیلیک صناعتی اوزاق زماندن بویان افغانستانده رواجلنگن و تیمیرچیلر بو صناعت نی خاص طریقه و مهارت بیلن آلغه آلیب باریشگن.
افغانستان تیمیرچیلری تامانیدن توزهلگن ملزمهلر صفتی و چیرایلیگی اینیقسه مس و آلمونیم ظرفلری خاص بولگنی سبب چیتایللیکلر اولردن فایدهلنگن، بیراق ایرکین بازار تیزیمی و مملکت بازارلری گه چیتایللیک ملزمهلر کیلیشی بو صناعت نی نابودلیککه روپهره قیلگن و بلخ ولایتی نینگ تیمیرچیلیک بازاری کمرنگ بولیشی اورنکلردن بیری دیر.
بلخ ولایتیدهگی تیمیرچیلردن بیرقطاری نینگ ایتیشیچه، مناسب بازار یوقلیگی، چیتایللیک ملزمهلر حددن تشقری مملکت گه کیلتیریلگنی و تیمیرچیلیک صناعتی دن حکومت حمایت قیلمهگنی باعث، مملکتده اوزاق تأریخ گه ایگه تیمیرچیلیک صناعتی سقوط قیلگن.
تیمیرچیلردن بیری حمیدالله نینگ سلاموطندارگه ایتیشیچه، اوتمیشلرده چوت، بالته، بالغه، بیل و باشقه تیمیر ملزمهلر توزهتهدی ایکن، بیراق حاضر بو صناعت کمرنگ بولگنی باعث، یالغیز بوزیلگن ملزمهلرنی قیته قورهدی.
شونینگدیک، بلخ ولایتی نینگ ایش و اجتماعی ایشلر ریاستی مسؤوللری، بو ولایتده تیمیرچیلیک صناعتی نابود بولیشی دن سوز یوریتیب ایتیشیچه، بلخ ده هیچ بیر تیمیرچی قالمهگن و یالغیز تیمیرچیلیک نامیده نیچه دکان قالگن و اولر بوزیلگن ملزمهلرنی قیته قورهدیلر.
بلخ ولایتیده ایش و اجتماعی ایشلر ریاستی نینگ بازار ایشی مسؤولی عبدالرسول یاردم نینگ ایتیشیچه، مملکت گه چیتایللیک ملزمهلر کوپ آلیب کیلینگنی باعث، بو ولایتده تیمیرچیلیک صناعتی نابودلیککه روپهره بولگن.
عین حالده، بلخ تیمیرچیلری نینگ ایتیشیچه، حکومت چیتایل دن کیلهدیگن صفت سیز ملزمهلرنینگ آلدینی آلمهگن صورتده، افغانستانده تیمیرچیلیک صناعتی بوتونلهی نابود بولهدی.
