د اوبو او انرژۍ وزارت چارواکي وايي، چې د بغلان ولایت په سیندي حوزه کې د اوبو خور لویو ویالو ۵ پروژې یې د ۳۳۰میلیونو افغانيو په لګښت ګټې اخستنې ته سپارلې دي.
د اوبو او انرژۍ وزارت مرستیال انجینیر شجاع الدین ضايي نن ( جون په ۴مه) په بغلان ولایت کې د یوې خبري غونډې په ترڅ کې وویل، چې دغه پروژه د ۵ اوبو خور لویو ویالو په جوړولو به شاوخوا له ۷۰ تر ۸۰ زره جریبه پورې کرنیزو ځمکو ته اوبه ورسوي.
د یاد وزارت مرستیال زیاته کړه، چې له دې پروژې نه د بغلان ولایت شاوخوا ۶۰ زره کورنۍ په مستقیم ډول او ۲۰ زره کورنۍ به په غیر مستقیمه توګه ګټه واخلي.
دغه د اوبو خور لوی ویالې د اوزغري، ترکمنو او د مرکزي بغلان په کندوز تیپه ولسوالۍ او د پلخمري په ګوهرګان او بالادوري کلیو کې کېندل شوي دي.
د اوبو او انرژۍ وزارت مرستیال همدا راز وویل، دغه پروژې ۲ کال وړاندې یې چارې پیل شوې وې چې اوس مهال ګټې اخیستو ته وسپارل شوې ده.
نوموړي زیاته کړه، چې د اوبو دغه بندونه د ۳۳۰ میلیونو افغانیو په لګښت جوړ شوی او ټولې مالي لګښت یې د المان هېواد له خوا وړکړل شوي دي.
ده ټینګار وکړ، چې په نږدې راتلونکي کې به په بغلان ولایت کې د څو عمراني پروژو کارونه پېل شي.
په ورته وخت کې د بغلان ولایت سرپرست والي خبر داری ورکړ، چې که حکومت د پلخمري د برېښنا بند ته پاملرنه ونه کړي شونې ده، چې دغه بند به په بغلان ولایت کې لوی ناورین رامنځته کړي.
د بغلان والي زیاته کړه، چې د پلخمري لومړي او دوېیم د برښنا بند له ۳ کلونو راهیسې زيانمن شوي او شاوخوا يې درزونه پېدا کړي.
بغلان هغه ولایت دی، چې د افغانستان په صادراتي توکو کې خورا مهم رول لري.
په دغه ولایت کې وريجې، جو، جوار او په ځانګړي توګه چغوندرو تولید يې خورا اهمیت لري.
د بغلان د قندو شرکت هره ورځ په وقفه وي ډول سره ۴۰ څخه تر ۵۰ ټنو پورې چغوندر پروسس کوي.
اقتصاد پوهان وايي، د دغه ولایت زیاتې ځمکې زراعتي دي او که چېرې په منظمه توګه يې وچې ځمکې خړوبې شي، نو د ښه زراعتي محصولاتو ظرفیت لري.
