بغلان قومندان‌لیگی‌نینگ ایتیشیچه، اوتمیش تورت کونده امنیتی کوچلر و طالب‌لر ارا اوتکزیلگن توقنه‌شوولرده جنگریلردن 59 کیشی هلاک و باشقه 45 کیشی تن جراحتی آلگن.
بغلان اولکه شمالیده، نیچه کون آلدین طالب‌لر قولیگه توشگن قندوز ولایتی بیلن چیگره داش دیر.
قندوز ایکی کوندن کیین طالب‌لر قولیدن آلیندی.
بغلان پولیس باشقرمه‌سیدن ترقه‌تیلگن خبرنامه‌ده کیلیشیچه، طالب‌لر قندوز شهری‌نینگ تصرف قیلیشلری بیلن بغلان ولایتی ده‌گی پولیس پوسته‌لریگه هجوم اویوشتیریشلری نتیجه‌سیده، مرکزی بغلان و بُرکه تومنلریده آغیر تلفات بیلن روپه‌ره بولگن‌لر.
خبرنامه نینگ کوپه‌یتیریشیچه، طالب‌لر قندوز شهرینی آلگن زمان، بُرکه، مرکزی بغلان، پلخمری، دوشی و تاله و برفک تومنلریده هجوم اویوشتیرگن ایکنلر.
خبرنامه‌ده کیلیشیچه، طالب‌لر تاله و برفک تومنینی سقوط قیلیشگه موفق بولگن‌لر، اما باشقه منطقه‌لرده امنیتی کوچلر قرشیلیگی بیلن روپه‌ره بولگن‌لر.
ایتیلیشیچه، مرکزی بغلان تومنی ده‌گی امنیتی کوچلر بیلن طالب‌لر ارا دوام ایتیب تورگن اوروش یکونله‌گن و طالب‌لر آغیر تلفات کوریشلری بیلن محل‌دن قاچگن‌لر.
مرکزی بغلان تومنی‌نینگ جرخشک، چهارشنبه تیپه و گرداب منطقه‌سیده طالب‌لر توسیب، امنیتی کوچلرنینگ قندوز شهریده ییتیب باریشلری آلدینی آلگن ایدی.
شونینگ‌دیک طالب‌لرنینگ بغلانده کمین توتیشلری سبب، کماندو کوچلری قندوز ولایتی‌گه کیشراق ییتیب بارگنلر.
شوحاضر بغلان ولایتی‌نینگ تاله و برفک، پلخمری شهری‌نینگ ایریم منطقه‌سی، دندغوری، دند شهاب‌الدین، دوشی تومنی‌نینگ ایریم بولیمی، بُرکه، مرکزی بغلان و دهنه غوری طالب‌لر تصرفی‌ده دیر و بو گروه کوچلری شوحاضر کابل – بلخ و کابل – قندوز یوللرینی تهدید بیلن روپه‌ره قیله آله‌دی.
