بغلان ولایتی نینگ محلی مسووللری، مرکزی بغلان تومنیدهگی ایکّی ییریک حربی قرارگاه آلیب چیقیلیشی اوچون بو توغریده حربی کینگش نینگ آلگن قرارینی بیکار اعلان قیلدیلر.
بغلان حربی کینگشی نینگ ییغینیدن فاش ایتیلگن حجتده، مرکزی بغلاندهگی ملی کوچلرنینگ ایکّی ییریک حربی قرارگاهی آلیب چیقیلیشی اوستیده اوشبو حربی کینگشده قرار قبول قیلینگن. بو کوچلرنینگ منطقهده امنیتنی تامین قیلیش اوچون ایجابی تاثیر بولمهگن لیگی سبب آلیب چیقیلیشی اویلنگن.
لیکن، ولایتده بوگون خبری انجمنده سوزلهگن بغلان ولایتی نینگ والیسی عبدالستار بارز مسالهنی تصدیقلب، ولایت مقامی اوشبو حجتنی بیکار اعلان قیلدی دیگن. مرکزی بغلاندهگی ییریک حربی قرارگاه نینگ حربیلری آلیب چیقلیشی ممکن ایمس دیدی جناب والی.
«لایحه کیم تامانیدن ایشلب چیقاریلیب سیزنینگ اختیارینگیزگه بیریلگن پیتده کوچگه کیریتیلیشی ممکن ایدی، هلی بو حجت کوچه کیریتیلیشی بیکار قیلیندی» دیگن ولایت والیسی جناب بارز.
شونینگدیک بغلان ولایت نینگ والیسی، ولایتده امنیت و برقرارلیک تامین ایتیلیشی اوچون حربی عملیاتلر اوتکزیلیشی انابتگه آلینگن لیگی حقیده اهالی گه ایشانچ بیرگن.
موضوع توغریسیده جدی خواطر بیلدیرگن بغلان ولایتی ولایت کینگشی نینگ بیر قنچه اعضالری، ایریم کیلیشوو اساسیده مرکزی بغلان تومنیدهگی منگلها منطقهسیده تاسیس بولگن ایکّی اولکن حربی قرارگاه طالبلرگه بیریلیب و ملی اردونینگ موجود کندکی هم تومندن چیقاریلیشی خصوصیده قرار آلگن دیگنلر.
بغلان ولایت کینگشی نینگ اعضاسی بسم الله عطاش، مذکور ایکّی حربی قرارگاهدن افغان حربی قوشینی آلیب چیقیلیشی حکومت همده شمالی ولایتلرنینگ زیانیگه سبب بولیشی هیچ زمان تَن آلینمیدیگن بیر قرار دیگن. او، اوشبو حربیلر مرکزی بغلاندهگی قرارگاهدن آلیب چیقیلگن حالده، دستلب مرکزی بغلان سونگ ولایت مرکزی جنگری طالبلر قولیگه اوتیشی امکاندن اوزاق ایمس بارهسیده اورغولهگن.
بیراق، سلاموطندار ترماغیگه صحبت بیرگن افغانستان ملی مدافعه وزیرلیگی سوزلاووچیسی نینگ اورین باسری محمد رادمنش، مرکزی بغلاندهگی حربی قراگاهدن ملی کوچلر آلیب چیقیلیش مسالهسی (بغلان حربی کینگشی) تامانیدن تکلیف ایتیلگن دیدی. لیکن، هنوزگچه وزیرلیک نینگ بلند مرتبهلی رسمیلری، بوحقده سونگی قرارنی آلمهگنلر دیگن جناب رادمنش. بغلان ولایتیده دولت قوراللی مخالفلری نابود ایتیلیشی اوچون وزیرلیک باشقه حربی عملیاتلرنی اوتکزیش مقصدی بار دیگن سوزلاووچی.
اوتگن ییل مملکت قوم وقبیلهلر همده چیگرهلر سابق وزیری گلاب منگل بغلان ولایتیگه قیلگن سفری چاغیده 9 مادهلیک بیر شرطنامهگه قول قویگن ایدی. بو کیلیشوو اساسیده ولایت نینگ دندغوری منطقهسی طالبلرگه بیریلگن ایدی.
