د بغلان ولایتي شورا، مدني فعالان او یوشمېر قومي مشران د دغه ولایت د والي په توګه د عبدالحی نعمتي په ګومارلو نیوکه کوي او له حکومته غواړي دغه ولایت له پاره ځوان او وړ والي ورمعرفي کړي.
د بغلان ولایتي شورا مرستیال محبوب الله غفاري سلام وطندار ته وویل، چې بغلان ولایت د کاروړ او ځوانو کدرونو ته اړتیا لري.
دی وايي، د بغلان امنیتي حالت پېچلی دی؛ نعمتي یې د اداره کولو توان نه لري.
دغه راز قومي مشران هم له حکومته غواړي، داسې یو کس د والي په توګه ورمعرفي کړي، چې د ادارې او همغږۍ وړتیا ولري.
دوی وايي، افغانستان له کدرونو ډک دی او باید یو ځوان او مدبره کس ورمعرفي شي.
د سیمه ییزو ارګانونو خپلواکې ادارې ویاندې منیره یوسفزاده سلام وطندار ته وویل، په کلیدي پوستونو په ځانګړي ډول د ولایت مقام له پاره د اشخاصو په ګومارلو کې یو له معیارونو د خلکو ملاتړ لرل دي.
دا په داسې حال کې ده، چې په بغلان ولایت کې د ناامنیو زیاتېدو له امله د دې ولایت والي او امنیه قوماندان ګوښه شوي وو.
