بروکسل انجمنی‌نینگ ایکّینچی کونیده یاردم کورسه‌تیوچی مملکتلر افغانستان‌گه مالی کومک بیریش اوستیده تاکید قیلگنلر. عین حالده، حکومت هم بو مالی کومکلر ایجابی صرفله‌نیشی اوچون وعده بیرگن.
بوگون بروکسل انجمنی‌نینگ رسماً آچیلیشی‌ده نطق سوزله‌گن افغانستان جمهور رییسی محمداشرف‌غنی مملکت خلقی‌نینگ 39% قشقالیک‌ده حیات کیچیره‌دی دیگن. بوندن تشقری مملکت‌ده‌گی جاری اوروش و نابرقرارلیک هر کون ملی کوچلردن قربانلیک آله‌دی دیگن جناب غنی. شونینگدیک افغان ملی کوچلری کونده 15 عملیات اوتکزه دیلر دییه بیلدیرگن مملکت رهبری.
یوتوقلر و موفقیتلر حقیده سوز یوریتگن جمهور رییس‌غنی افغانستان اوتگن اون بیش ییل آقیمی‌ده دنیانینگ منتظم روش‌ده کورستگن مالی همکارلیگی بیلن ایریم اوزگریشلر گواهی بولگن دیدی. افغانستانده عیاللر- ایرککلر بیرگه لیک‌ده ایش قیلیشی، دولت درآمدی 20% آشگنی و بیرینچی بار ییریک سوو توغانی قوریلیشی کبی اوزگریشلرگه اشاره قیلگن جمهور رییس.
غنی دنیانینگ دولتلریگه مملکت‌ده یخشی حکومتچیلیک و شایسته سالارلیکنی کوچلنتیریش خصوصیده وعده بیرگن. اداری فسادگه قرشی کوره‌ش اوچون کوچلی بیر اداره آچیلگنی و بو توغریده جدی آدیم کوتاریلیشی حقیده ینه بیر بار تاکید له‌گن مملکت رهبری. عین حالده، افغانستان رهبری دنیا دولتلریدن ترورچیلیک همده قشاق‌لیگه قرشی مبارزه اوچون کوپراق اعتبار بیریلیشی‌نی ایسته‌گن.
ییغینده صحبت قیلگن امریکا تشقی ایشلر وزیری جان کری افغانستان دنیا اوچون اوته مهم لینگی‌نی ینه بیر بار تیلگه آلگن. او، طالبلرنی امریکا افغانستان‌نی یالغوز قالدیرمیدی دییه آگاه لنتیرگن. طالبلر اوروش آرقه‌لی اوز نیتلریگه ییته آلمس لیکلرینی بیلدیرگن جان کری، افغانستانده اختلاف‌گه پایان بیریش‌نینگ بیرینچی یولی مذاکره دیگن.
جان کری، خلق ارا حربیلر افغانستان‌نی ترک قیلگندن سونگ بو مملکت‌ده دایمی برقرارلیک‌که فتور ییتمه‌گونگه قدر امریکا قوشینلری افغانستانده قالیشی ممکن دیگن. اقش تشقی ایشلر وزیری نینگ سوزلریگه کوره، مملکتی 2020 – ییلگه قدر افغانستان‌گه همکارلیک قیلیش اوچون بیرگن وعده‌سیگه عمل قیله‌دی. بو مملکت هم اوزگریش دهه سیده اوز ایاغیگه توریشی هم کیره‌ک دیگن جان کری.
افغانستان دولتی اداره‌لریده‌گی خاتین – قیزلر رولی اوستیده تاکید قیلگن جان کری، رسمی کابل اداره‌لریده ایش قیله دیگن افغان عیاللری آلقیش‌گه سزاوار دیگن. او، ملی بیرلیک حکومتی رهبرلریدن وعده لریگه عمل قیلیب، حساب بیریشلرینی سوره‌گن.
بروکسل انجمنی نینگ ایکینچی کونیده سوزگه چیققن بیرلشگن ملتلر تشکیلاتی نینگ باش کاتبی بانکی مون، افغانستان حکومتی‌دن عیاللرگه مخصوص اعتبار قره‌تیشنی طلب قیلیب تنیچلیک لایحه‌سیگه بو قتلم‌گه حصه بیریلیشی کیره‌ک دیگن. شونینگدیک بیرلشگن ملتلر تشکیلاتی نینگ باش کاتبی افغانستان حکومتی رهبری بیرگن وعده لریگه عمل قیلیب، حساب بیریشی اوستیده علیحده تاکید ایتگن.
اروپا اتفاقی‌نینگ تشقی سیاستلر مسوولی فدریکا موگرینی، افغانستان اخیرگی اون بیش ییل ایچیده سیزیلرلی اوزگریشلر گواهی بولگن و اروپا بیرلشمه‌سی ایسه افغانستان‌نی رواجله‌نیش ساحه‌ده جدی حمات قیله‌دی دیگن. او هم مملکت‌ده عیاللر حق وحقوقی تامین ایتلیشی‌گه اورغوله‌گن.
بروکسل ییغینی (4-5 اکتبر) بلژیک‌ده اوتکزیلماقده. بو ییریک انجمن‌ده دنیانینگ 70 دولتی نماینده‌سی شامل 20دن آرتیق خلق ارا تشکیلات‌نینگ وکیللری قتنشگنلر.
