دا فغانستان د بشري حقونو خپلواک کمېسیون وایي، چې حکومت د ښځو او ماشومانو د حقونو په برخه کې د بروکسل غونډې له پاره ژمنې نه دي عملي کړي.
د دغه کمېسیون چارواکي وايي، چې د ملي یووالي حکومت ونه شو کولی، هغه ژمنې عملي کړي، چې د ماشومانو او ښځو د حقونو په برخه کې یې له نړیوالو سره کړې وې.
ټا کل شوې د راروانې اکټوبر میاشتې په لومړیو کې په غیرپوځي برخو کې په ځانګړي توګه په بنسټیرو برخو کې د نړیوالو مرستو د جلبولو په موخه د بلجیم په بروکسل کې غونډه جوړه شي.
د افغان چارواکيو بروکسل غونډې کې ژمنه کړې وه، چې په ټاکنیز نظام کې به د سمونو ترڅنګ اقتصادی ودې کې د پراختیا راوستلو، له فساد سره مبارزه او د ښې حکومتولي په برخه کې هر اړخیز کار، په اقتصادي بساینه کې د ښځو پراخې ونډې او د ماشومانو حقونو ته کار کوي.
د افغانستان د بشری حقونو سازمان مشرلعل ګل لعل وايي، چې حکومت خپلې ژمنې د خلکو او نړیوالې ټولنې له غوښتنو سره سمې د ښځو او ماشومانو د حقونو په برخه کې نه دي عملي کړي او تش لاس د بروکسل غونډې ته ځي.
د لعل په خبره، لا هم په زرګونو کوچنیان په شاقه کارونو بوخت دي او زده کړو ته په کافي اندازه لاس رسی نه لري.
د افغانستان د بشرې حقونو د سازمان مشر زیاتوې، چې د ښځو او ماشومانو د حقونو د تر پښو لاندې کولو ترڅنګ د امنیت نه شتوالی د دې لامل شوی، چې د دوی حقونه تر پښو لاندې شي.
په ورته وخت کې د ماليې وزارت ویاند اجمل حمید عبدالرحیمزي سلام وطندار ته وویل، چې په اقتصادي برخه کې د ښځو پراخه ونډه او د ماشومانو حقونو ته پاملرنه زیاتول؛ د بروکسل غونډې مهمې ژمنې وې، چې په دې اړه د نړیوالو مرستو د راجلبولو له پاره د ښځو چارو، ټولینزو چارو وزارتونو او د افغانستان د بشري حقونو د خپلواک کمېسیون له خوا یوه ګډه طرحه جوړه شوې ده.
بل خوا د افغانستان د ښځو بنسټ غړې وايي، هغه کارونه چې د ښځو او مېرمنو د حقونو په برخه کې اړتیا ده، نه دې شوي. دوی په حکومت کې د ښځو د ونډې پر کمښت هم نیوکه کوي.
د افغان مېرمنو د ټولنې غړې روشن څېړن وایې، چې ښځې باید د حکومت په مهمو تصمیمونو کې ونډه ولري او حکومت هغه ژمنې چې د بروکسل په ناسته کې یې نړیوالې ټولنې ته ورکړې وې؛ باید له ښځو سره په مشوره عملي کړي.
افغان حکومت به په څو راتلونکیو ورځو کې د نړیوالې ټولنې د مالي ملاتړ د جلبولو په موخه په بروکسل غونډه کې کډون وکړي او د خپلو پخوانیو ژمنو په اړه به د نړۍ هېوادونو ته خپل راپور واروي.
