بدخشان ولایتیده ساووق موسومی ایتیب کیلیشی و قطار تومنلرنینگ قتناو یولی یاپیلیب قالیشی بیلن مذکور تومن یشاوچیلریدن بیرقطاری بدخشان محلی حکومتینینگ طبیعی حادثهلرگه قرشی کورهشه آلمسلیگیدن خواطر بیلدیرگنلر.
بدخشان ولایتی کینگش اعضاسی طلبالدین قادرینینگ ایتیشیچه، محلی حکومت طبیعی واقعهلرگه قرشی کورهشیش خصوصیده کوچسیز دیر و احتمالی طبیعی واقعهلرگه قرشی کورهشیش اوچون تیارگرلیگی یوق دیر.
جناب قادری گه کوره، طبیعی واقعهلر تهدیدیگه قرار تاپگن منطقهلرده آذقه-اوقات مادهلریگه گدام قوریلمهگن صورتده، واقعه یوز بیرگن چاغده همکارلیک یتکیزیش جدی قیینچیلیک بیلن روپهره بولهدی.
بدخشان چیگرهلریده بولگن تومنلریشاوچیلریدن بیری جواد سیدینینگ سلاموطندارگه ایتیشیچه، آذقه- اوقات، حیوانلرگه اوسمیلیک و کسللرگه دارو یوقلیگی اولرنی خواطرگه تشلهگن.
اونینگ ایتیشیچه، حکومت هردایم طبیعی واقعهلرگه قرشی کورهشیش اوچون تیارگرلیک آلگنیدن خبر بیرگن؛ بیراق واقعه یوز بیرگن چاغده، زیان کورگنلرگه هیچقندی همکارلیک صورت تاپمهیدی.
عینحالده، طبیعی واقعهلرگه قرشی کورهش اداره مسووللرینینگ ایتیشیچه، طبیعی واقعهلرگه قرشی بوتون تیارگرلیکلر آلینگن.
بدخشان ولایتیده طبیعی واقعهلرگه قرشی کورهش اداره باشلیغی سیدعبدالله همایون دهقاننینگ ایتیشیچه، اوشبو اداره باشقه نهادلر همکارلیگی بیلن قطار تومنلرده آذقه-اوقات مادهلریگه گدام قورگن و واقعه یوز بیرگن چاغده، زیان کورگنلرگه همکارلیک ایتیلهدی.
بدخشان محلی مسووللری، طبیعی واقعهلرگه قرشی تیارگرلیک آلینگنی توغریسیده صحبت قیلهدیلر؛ بیراق بدخشان ولایتی کینگش اعضالرینینگ ایتیشیچه، حاضرده بدخشان 16 تومنینینگ قتناو یولی یاپیق دیر و محلی حکومت مذکور یوللرنی آچیشگه موفق بولمهگن.
