بیراوینی سیوگن محبالله و سامعه اونه شیشگه کیلیشگن ایکنلر، لیکن قضیهدن نیچه کون اوتمسی، محل یشاوچیلری بولرنینگ علاقهسیدن خبر بولهدیلر و نهایتده ایکیسینی هم کلتکلب قیزنینگ ابه سیگه ییتکزهدیلر و ابهسی، محبالله و سامعهنی اوق بیلن آتیب اولدیرهدی.
بو حکایه فاریاب ولایتی قیصار تومنی نینگ قیشلاقلریدن بیریده بولیب اوتگن.
قیصار تومنی نینگ اولوسوالی رحمتالله قیصاری نینگ سلاموطندارگه ایتیشیچه، بو گناهسیز قیز و بچه قیصار تومنی نینگ بازاریده اهالی حضوریده آتیب اولدیریلگنلر.
فاریاب پولیس قومندانلیگی سوزلاوچیسی عبدالکریم یوروش حادثهنی تأیید قیلیب ایتیشیچه، قیز و ییگیت ایکیسی هم کوهی قیشلاقی یشاوچیسی ایکنلر. یوروشگه کوره، دستلب بو ایکی کیشی محل یشاوچیلری تامانیدن کلتکلنیب اوندن کیین اولدیریلگنلر.
جناب یوروش نینگ ایتیشیچه، حادثه بارهسیده تیرگاو باشلنگن و تیزلیکده قضیه عامللری قولگه آلینهدی.
فاریابدهگی بشر حق حقوق ایرکین کمیسیونی نینگ باشلیغی حفیظالله فطرت هم حادثهنی قارهلب امنیتی کوچلردن حادثه عامللرینی قولگه آلیب محکمه گه معرفی قیلیشلرینی ایستهدی.
هرییل خشونتلر سانی یوقاری کیته دیگن ولایتلریدن بیری فاریاب دیسه خطا بولمس. مذکور ولایت دولتآباد تومنیده هم شو سونگیده بیر قیز و ییگیت بیراوینی سیوگنلیگیگه عیبلب اوققه بیریلگن ایدیلر.
