بدخشان ولایتی‌نینگ مرکزی فیض‌آباد شهری‌نی قیشلاقلری و محله‌لریدن کوپینچه‌سی‌نینگ آتی، مذکور ولایت‌نینگ محلی صنعت‌لری بیلن باغلیق دیر؛ دیگریزی، الَه‌چه‌بافی، کفش دوزی، چرم‌گری و شونگه اوخشه‌گن آت‌لر زمانیده بدخشان محلی قول صنعت‌لری یخشی و کینگ شکلده رواجلنگن تأریخی‌دن حکایت قیله‌دی.
بیراق، حاضرگی کونلرده مذکور ولایت‌نینگ اوتمیش‌ده بولگن محلی قول صنعت‌لری رواجلنگنیدن هیچ خبر یوق دیر.
بو وضعیت‌نی ایسکی مسگرلردن بیری فیض‌محمد یخشی‌راق سیزه‌دی. اونینگ ایتیشیچه، دولت دقت‌سیزلیگی و اهالی‌نینگ ایسته‌گی یوقاری کیتگنی باعث، ایسکی ایشلریدن نیازلرینی تأمین قیله آلمه‌یدی و شو یوزه‌دن باشقه ایشلرگه قول اوریش‌لری کیره‌ک.
اوشبو شکایت و ناراضیلیک‌نی مذکور ولایت‌نینگ صنعتچی عیاللریدن هم ایشیته‌میز.
بدخشان ولایتیده صنعتچی عیاللر قوریلمه‌لریدن بیرینی مسؤولی نادیه سادات نینگ ایتیشیچه، یوره‌گیده بار تویغو و قونت بیلن ایش گه باشله‌گن ایکن؛ بیراق حاضر اونگه قالگن نرسه، کیله‌جک خواطری و قیغو دیر.
محلی قول صنعت‌لری نابود بولیشی توغریسیده اقتصادی ایش بیلرمانلردن بیری عبدالغفور فروغ‌یننگ ایتیشیچه، محلی قول صنعت‌لری نابود بولیشی خواطر دیر. دولت بو مسئله‌نی جدی آلیب و چاره تدبیر کوریشی لازم.
بیراق، بدخشان ولایتیده اقتصادی ریاستی باشلیغی عبدالحسیب دقیق نینگ ایتیشیچه، اولر محلی اقتصادی رواجلنیش پلانی اساسیده، یاردم بیرووچی اداره‌لرنینگ همکارلیگی‌ده ایریم برنامه‌لرنی قولگه آلگن و قولگه آلینگن برنامه‌لر عمل‌گه آشیریلگن صورتده، محلی صنعت‌لر نابود بولیشی آلدی آلینه‌دی.
بدخشان محلی رسمی‌لری، محلی صنعت‌لر رواجلنتیریلیشی‌نی بیرینچی ایشلریدن دیب بیله‌دی. اولرنینگ ایتیشیچه، ایچکی درامد قولگه کیریته‌دیگن برنامه‌لرنی فعال قیلیب و محلی اقتصاد رواجلنیشی‌گه یاردم بیریش اوچون سعی و حرکت قیله‌دیلر.
