.jpg)
د بدخشان ولایت مرکز فیضاباد کې د دې ولایت له ټولو ولسوالیو صنعکاران، کسبګر، هنرمندان او حکومتي مسوولان راټول شوي چې د ښځو لاسي صنایع، موسیقي او محلي لوبو په وړاندې کولو سره ګرځندویانو ته د بدخشان جغرافیې ارام او ډاډمن انځور وړاندې کړي.
د بدخشان د اطالاعاتو او فرهنګ ریاست کې د ګرځندوی برخې مسوول صدیقي لعلزاد د دې جشنوارې په څنډې کې سلام وطندار ته وویل، بدخشان د زیاتو توریستي جاذبې په لرلو سره د ګرځندوی صنعت پیاوړتیا بالقوه ظرفیتونه لري.
د ښاغلي لعلزاد په وینا، له یو کال راهیسې دې ولایت ته زیات شمېر بهرني ګرځندویان ورغلي او دوی هڅه کوي چې د دا ډول جشنوارو له لارې د بهرنیانو پام دغه ولایت ته ورواړوي.
بدخشاني صنعکاران او کسبګر د دا ډول جشنوارو هرکلی کوي او وایي دغه کار د بدخشان توریستي جاذبو په پېژندلو کې مثبت رول لوبوي.
.jpg)
له ناامنیو، د لارو خرابوالي او ګرځندویانو ته د خوندي ځایونو نهشتوالي سره ـ سره د اطلاعاتو او فرهنګ وزارت چارواکي په بدخشان کې د ګرځندوی صنعت پراختیا پروګرامونو خبرې کوي.
د اطلاعاتو او فرهنګ وزارت معینه مژګان مصطفوي وایي، د دوی وزارت په پام کې لري چې د ګرځندوی صنعت پیاوړتیا په موخه پ ګرځندوی ډیپارټمېنټ سربېره په بدخشان کې روزنیز او فرهنګي مرکز، موزیم، کتابتون او ارشیف جوړکړي.
بدخشان د ډېرو توریستي سیمو لرلو سره د ګرځندوی صنعت پیاوړتیا ښه ظرفیت لري؛ خو د ناامنیو له امله ګرځندویان دغه ولایت ته لږ سفرونه کوي.
یو شمېر بهرني ګرځندویان د ناامنیو، ستونزمنو لارو، معیاري هوټلونو او هوایي ډګر نهشتوالي په سبب د تاجیکستان له لارې د بدخشان توریستي سیمو نندارې ته ځي.
