بدخشان ولایتیده بیرلشگن ملت‌لر تشکیلاتی‌نینگ مخدره ماده و جنایی جرم‌لرگه قرشی کوره‌شنی اویغونلشتیرووچی دفتری یا-ده UNODC مسؤولی محمدحسین جلیلی‌نینگ سلام‌وطندارگه ایتیشیچه، مذکور ولایت ده ناتینچلیک‌لر کینگه‌یگنی و ناقانونی قوراللی گروهلر کوچلنگنی باعث، کوکنار ایکینی ایکی برابر بولگن و جاری ییل‌ده 20 مینگ هکتار ییر کوکنار ایکینی اوچون اجره‌تیلگن.
جناب جلیلی گه کوره، ناتینچلیک کینگه‌یگنی و ناقانونی قوراللی گروهلرنینگ فعالیت‌لری کوپه‌یگنی گه قوشیمچه، مخدره ماده گه قرشی کوره‌ش قانونی تطبیق ایتیلیشی توغریسیده حکومت‌نینگ دقت سیزلیگی بدخشانده کوکنار ایکینی کوپه‌ییشی گه سبب بولگن.
بدخشان ولایتیده کوکنار ایکینی کوپه‌یگنینی تصدیق‌لگن مذکور ولایتده مخدره ماده گه قرشی کوره‌ش اداره باشلیغی محمدقاعد افندی‌نینگ ایتیشیچه، اوتگن 3 ییل‌ده بدخشانده کوکنار ایکینی کمیده صفرگه قویی توشگن ایدی؛ بیراق ناتینچلیک و سیلاولر یولگه قوییلیش بهانه‌لری باعث، ایکینچی‌لر قانون و جزا لایحه‌سیدن چیقیب قیته‌دن کوکنار ایکیش گه باشله‌گن.
.jpg)
بدخشان پولیس قومندانی محمدصابر آرین‌نینگ ایتیشیچه، طالب‌لرنی حمایه قیله‌دیگن بیرینچی منبع کوکنار دیر و شو یوزه‌دن بدخشان‌نینگ نیچه تومنیده کوکنار ایکینزارلرینی نابود قیلیش ایشی باشلنگن و پولیس کوچلری کوکنار محصولاتی‌نی نابود قیلیش توغریسیده سعی و حرکت قیله‌دی.
بدخشان ولایتیده مخدره ماده گه قرشی کوره‌ش اداره مسؤوللری‌نینگ ایتیشیچه، 10 کوندن بویان بیرقطار تومن‌لرده کوکنار ایکینزارلرینی نابود قیلیش ایش باشلنگن و حاضرگچه کمیده 200 هکتار ییر کوکنار ایکینزاریدن تازه‌لنگن.
