بدخشان محلی حکومتی کرونا ویروس کسللری و اوشبو ویروسگه شبههلی کیشیلر دارولنیشی و قرنطین قیلینیشی اوچون مذکور ولایت نینگ بیلیم یورتینی حقوق و شرعیات فاکولتهلری گه تیگیشلی بنالرنی کروناگه خاص یوز یاتاقلیک کسلخانه ایجاد قیلگن و بو کسلخانه اوچون ۴۸ میلیون افغانی گه طبی جهاز ساتیب آلگن.
اوشبو مرکز ده تجهیزات ساتیب آلینیشی و ساغلیک خذمتلر ارایه قیلینیشی هردایم تنقیدلر بیلن روپهره بولگن و کینگ شکلده فساد بولگنی خصوصیده صحبت قیلینگن. ینگیلیکده مدنی جماعهچیلیک و بدخشان ولایتی بوییچه داکترلر انجمنیدن تشکیل تاپگن قوشمه بیر تیم مذکور مرکز و تجهیزاتلردن نظارت قیلگن. نظارت قیلیووچی تیم اعضالری، طبی جهازلر ساتیب آلینیشیگه فساد بولگنی و کسللرگه قابل قبول خذمت ارایه قیلینمهیشیدن تنقید قیلگنلر. اوشبو تیم اعضالری نینگ ایتیشیچه، مذکور مرکز ده خیالی ایشلاوچیلر استخدام قیلینگن.
نظارت قیلیووچی تیم اعضالریدن بیری اجمل درویش نینگ ایتیشیچه، بدخشان ولایتی بوییچه ساغلیقنی سقلش ریاستی، ساتیب آلینگن جهازلرنینگ برگهلرینی اولر اختیاریگه قویشنی ایستمهریدی، بیراق اولر بو برگهلرگه قول تاپگنلر.
سلاموطندار اختیاریگه قرار تاپگن حجتلرگه کوره، مذکور مرکز اوچون 55 پایه چینایی تختلر «محسن مسعود» ناملی بیر شرکت دن 48 مینگ افغانیدن ساتیب آلینگن.
اجمل درویش نینگ ایتیشیچه، بیر تخت نینگ 48 مینگ افغانی ساتیب آلینیشی اهالی و دولت حقیده کته جفا دیر. اونینگ ایتیشیچه، کرونا ویروسی چیقگنیدن سونگ، مذکور تختلرنینگ بهاسی 20 مینگ افغانی ایکن.
بو تختلرنینگ تصویرلری اجتماعی ترماقلرده قولمه قول بولهدی و اجتماعی ترماقلر ایشلاوچیلری تمسخر شکلده اولرگه «جادویی تختلر» نام قویگنلر.
باشقه بیر حجتگه کوره، 4-3-1399- تاریخ ده مذکور شرکتدن 15 قلم طبی جهازلر ساتیب آلینگن و هر PPE کیت بهاسی 850 افغانی درج قیلنگن، بیراق نظارت قیلیووچی تیم اعضاسی ستوری یزدانپرست نینگ ایتیشیچه، اوشبو کیتلر بازار ده 3 یوز افغانی ساتیلهدی. اونینگ ایتیشیچه، بدخشان ولایتی بوییچه ساغلیقنی سقلش ریاستی عیاللرنی قرنطینه قیلیش و درمانلش بولیمیده هیچقندهی سعی و حرکت قیلمهگن.
حجتلرگه کوره، بیر دانه مقطر سووی 303 افغانی کابلدن ساتیب آلینگن، بیراق مذکور سوو بدخشان ده ایکی افغانی ساتیلهدی.
بدخشان ولایتی بوییچه ساغلیقنی سقلش ریاستی باشلیغی نور خاوری نینگ مذکور تیم ادعالرینی رد قیلیب ایتیشیچه، اولر اوزلرینی مطرح قیلیش اوچون بوندهی ایشلرنی انجام بیرهدی و ایشلری نمایشی دیر.
اونینگ ایتیشیچه، فعالیتلری خصوصیده طرفسیز نهادلرگه حساب بیریشگه حاضر دیر.
جناب خاوریگه کوره، طبی جهازلر بدخشان محلی ادارهسی تامانیدن تشکیل تاپگن هیات تامانیدن ساتیب آلینگن.
خاوری نینگ ایتیشیچه، اوشبو مرکزنینگ ساغلیک خذمتلر ارایه قیلیشی AKHS دفتری یا-ده (خدمات صحی آغاخان) گه تاپشیریلگن و ساغلیقنی سقلش ریاستی یالغیز نظارت قیلهدی.
عینحالده، بدخشان حاکمی سوزلاوچیسی نیکمحمد نظری نینگ ایتیشیچه، طبی جهازلرنی ساتیب آلهدیگن پیتلرده برچه کالالرنینگ بهاسی یوقاری کیتگن ایدی و بو توغریده فساد صورت تاپمهگن.
نظارت قیلیووچی تیم نینگ ادعا قیلیشیچه، اوشبو مرکز ده خیالی ایشلاوچیلر استخدام قیلینگن. استوری یزدانپرست نینگ ایتیشیچه، اولرنینگ اختیاریگه قرار تاپگن اسنادلرگه قرهگنده، 195 کیشی بو مرکز ده استخدام بولگن، بیراق یالغیز 45 کیشی هرکون حاضر بولهدی.
بدخشان ولایتی بوییچه ساغیلیقنی سقلش ریاستی باشلیغی نینگ خیالی ایشلاوچیلر استخدام قیلینگنینی رد قیلیب ایتیشیچه، مذکور مرکز ده 110 کیشی ساغلیک خذمتلر ارایه قیلهدی.
نیچه پیت آلدین بدخشان مدنی جماعهسی تامانیدن بیر تصویری نوار ده کرونا ویروسیگه چلینگنلر کیفیتسیز آذیق-آوقات، ماسک و ضد عفونی مایع یوقلیگیدن شکایت قیلگن ایدیلر، بیراق ساغلیقنی سقلش ریاستی باشلیغی کسللرنینگ ادعاسی نی رد قیلیب و ساغلیک خذمتلر کامل صورتده، ارایه قیلینهدی دیدی.
عینحالده، بدخشان ولایتی کینگشی کاتبی احمد جاوید راغی نینگ ایتیشیچه، اولر اوشبو هیات ادعالرینی تیکشیرهدی. جناب راغی، بو مرکز ده فساد بولگنی خصوصیده هیچنرسه دیمهیدی، بیراق طبی جهازلرنی یوقاری بهاده ساتیب آلینگنینی بیلدیرهدی.
