بامیان ولایتیده عیاللر ریاستینی اجتماعی مدیری هواگل رضایی، مذکور ولایتنینگ ورس تومنیده مخدره ماده گه چالینگن عیاللرنینگ میزانی کوپهیگنیدن خواطر بیلدیریب ایتیشیچه، اوشبو تومننینگ شیوقل، پژندُر، زیرکوه لیگان و سرسنگ قیشلاقلری اهالیسیدن 95% مخدره ماده گه چالینگن و اولردن کوپینچهسینی عیاللر تشکیل بیرهدی.
رضایی گه کوره، ورس تومنینینگ قیشلاقلریدن کوپینچهسیده عیاللر باش آغریق، یورک، بیل آغریق و ساووقلیک کسللیکلرینی دارولش اوچون تریاکدن فایدهلنهدیلر و بو ایش باعث، اولر مخدره ماده گه چالینهدی.
شونینگدیک، ورس تومنینینگ مدنی فعاللری، بو توغریده خواطر بیلدیریب ایتیشیچه، اوشبو تومنده عیاللردن کوپینچهسی تورموش اورتاقلری تامانیدن مخدره ماده گه چالینگن.
مدنی فعال امین دانشیارنینگ ایتیشیچه، ورس تومنیده بنگیلرنی دارولش اوچون 20 یاتاقلیک بیر کسلخانه موجود؛ بیراق مخدره ماده گه چالینگن عیاللرنی دارولش اوچون عیال داکتر یوق دیر.
دانشیارگه کوره، ورس تومنیده 1700 دن آرتیق کیشی مخدره ماده گه چالینگن و اولردن 20% عیاللر تشکیل بیرهدی.
شو توغریده…
کنر ولایتینینگ بنگیلریدن کوپینچهسی کریستال گه یوز کیلتیرگن
بنگیلر: بغلان بنگیلریگه حکومت رسمیلری و زورهوانلر مخدره ماده ترقتهدی
دولت طرفدارلری و مخالفلری بنگیلردن عسکر آلیشده رقابت قیلهدیلر
بامیان ولایتیده مخدره ماده گه قرشی کورهش اداره باشلیغی آقاحسین نظرینیکپی نینگ ایتیشیچه، مخدره ماده گه چالینگنلرنی تانیش اوچون اوشبو ولایت گه ایکی سیار تیم کیلگن.
نیکپینینگ ایتیشیچه، بامیان بنگیلری دارولنیشی اوچون مخدره ماده گه قرشی کورهش وزیرلیگیگه 100 یاتاقلیک بیر کسلخانه ایجاد ایتیلیشینی تکلیف قیلگنلر.
بامیان ولایتیده مخدره ماده گه قرشی کورهش ریاستینینگ معلوماتی اساسیده، بو ولایتده مخدره ماده ایکیلیب و ایشلب چیقاریلمهیدی؛ بیراق قاچاقچیلر غزنی و دایکندی ولایتلریدن مخدره ماده نی بو ولایت گه قاچاق قیلهدیلر.
سونگی ییللر بامیان ولایتیده 50 مینگدن آرتیق بنگی تانیلگن.
