بامیان ولایتی‌نینگ مرکزیده جایلشگن درۀ فولادی قیشلاغی یشاوچیسی 23 یاشی‌ده بولگن میرزاحسین حیدری، طالبان و داعش گروهی گه قرشی کوره‌شیب کیلگن مینگ‌لرچه باتور ییگیتدن بیری بولیب و کوپینچه‌سی بو یولده جان بیرگن.
اونینگ ایتیشیچه، کمیده 8 ییل آلدین کابل‌ده 6 آیلیک حربی تعلیمات نی اوتکزگنیدن کیین 215 میوند قول اردوسی گه قوشیلگن و هلمند ولایتی نینگ «تریخ‌ناور» منطقه‌سیده یوباریلگن، بیراق ملی اردو کوچلری صفیده 2 ییل و 2 آی خدمت قیلگنیدن کیین، بیر پارتلش نتیجه‌سیده آیاقلری و قوللری نینگ برماق‌لری کیسیگلن.
میرزاحسین گه کوره، او 215 میوند قول اردوسی‌نینگ بریدمل‌لریدن بیری دیر و تریخ‌ناور منطقه‌سیده یوللرنی خوفسیزلیگی نی تامین‌لش بیلن شغللنگن بیر چاغده، یول چیککه‌سیدگی ماین گه دوچ کیلیب و ناگران بولگن.
اونینگ ایتیشیچه، اوشه پیت 17 یاشر بولیب و یاشی نینگ قویی بولگنی باعث اردو کوچلری صفیده قتنه‌شیش اوچون شرایط گه ماس ایمس ایکن، بیراق وطن‌سیورلیک حسی بیلن اردو صفیده قتنشگن.
هلمند نینگ ناتینچ تومن‌لریده جمله‌دن، نادعلی، نوزاد، گرشک، سنگین و تریخ‌ناور منطقه‌سیده وظیفه اوتکزگن میرزا حسین، حکومت رسمی‌لریدن گله قیلیب ایتیشیچه، آیاقلری و برماق‌لری نینگ قولدن بیرگنیدن 5 ییل اوتماقده، بیراق حاضرگه قدر حکومتی مسئوللر و ملی مدافعه وزیرلیگی رسمی‌لریدن کیمه‌سه اونگه یاردم بیریب یا-ده اونینگ وضعیتی‌دن خبر آلمه‌گن.
شو توغریده:
ملی اردو نینگ اوشبو سابق عسکری حاضر آته، آنه، بیر سینگلی و ایناغه‌سی بیلن بامیان ولایتی‌ده قشاقلیک حالتده حیات کیچیرماقده.
اوشبو عسکرنینگ آنه‌سی سلطنت نینگ ایتیشیچه، شونینگدیک تورموش اورتاغی (اِیری) آیاقدن ناگران دیر و میرزا حسین نینگ آیلیگی بیلن کوپ قیینچیلیککه کونده‌لیک احتیاجات‌لرینی رفع قیله‌دیلر.
میرزاحسین نینگ آنه‌سی حکومتدن اوغلی نینگ دولتی اداره‌لردن بیری گه ایش گه آلیشی نی سورهیدی. خانم سلطنت گه کوره، اوغلی نینگ آیاقلری و قول‌لرینی برماقی مملکتدن مدافعه قیلیش اوچون کیسیلگن، بیراق اونینگ ذهنی و فکری یخشی دیر و یازه‌آله‌دی. او، حکومتدن اوغلی گه ایش زمینه‌سی یره‌تیشی نی سورهیدی.
میرزاحسین نینگ ایتیشیچه، حقوقی ییللیک تولنه‌دی و اونینگ حقوقی اوز عایله‌سی نینگ خرجتی نی تامین قیله آلمه‌یدی. او، یاردم بیروچی اداره‌لر و حکومتی مسئوللردن بو توغریده همکارلیک قیلیش‌لرینی طلب قیله‌دی.
