له هغه وروسته چې کورنټین مات شو او بامیان ولایت ته زرګونه کورني سیلانیان ورغلل، په دغه ولایت کې د محلي تولیداتو لومړنی دوبنی نندارتون پرانستل شو.
په یاد نندارتون کې د ښځینه سوداګرو ټولنو او کروندګرو خپل لاسي صنایع او محصولات د دوو ورځو لپاره نندارې ته ايښي دي.
د بامیان والي سیدانور رحمتي د دغه نندارتون د جوړېدو موخه د ښځینه سوداګرو د ټولنو او کروندګرو ملاتړ او د دغه ولایت د محلي تولیداتو او محصولاتو لپاره بازارموندنه ښيي.
رحمتي د اختر په ورځو کې بامیان ولایت ته د ګڼشمېر سیلانیانو د ورتلو خبر ورکوي او له هغوی غواړي چې جوړ شوي نندارتون ته هم ورشي.
د بامیان ولایت ښځینه سوداګرې او کروندګر د دغه دوبني نندارتون د جوړېدو هرکلی کوي او هغه د دوی د لاسي صنایعو او محصولاتو لپاره د بازارموندنې په برخه کې ګټور یادوي.
د بامیان ولایت دوه سوداګرې عذرا لعلي او زهرا کاظمي وايي، هغه لاسي صنایع یې چې د کورنټین پر مهال جوړ کړي، په یاد نندارتون کې یې نندارې ته ايښي، څو یې په پلورلو سره د کورنۍ لګښت پوره کړي.
یوشمېر سیلانیان چې دغه نندارتون ته ورغلي، د بامیان محلي تولیدات او کرنیز محصولات بېساري بولي.
د بامیان ولایت د ښځو لاسي صنایع او محلي تولیدات نړیوال شهرت لري. دغه ولایت په ۲۰۱۶ کال کې د ښه کیفیت لرونکو لاسي صنایعو د تولید او لږ پیدا کېدو له کبله د ملګرو ملتونو د علمي، کلتوري او ښوونیز سازمان (یونسکو) له لوري په نړۍ کې د نوښتګرو ښارونو غړیتوب ترلاسه کړ.
