د بامیان د پوهنې ریاست مسوولان وايي، د دغه ولایت یوشمېر اوسېدونکو خپلې څو جریبه کرنیزې ځمکې د ښوونځي جوړولو ته ځانګړې کړې دي.
د بامیان د مرکز پولادي درې یو اوسېدونکی حیدر وايي، خپله درې جریبه ځمکه یې د «زکریاي پولادي» په نوم یوه ښوونځي ته ورکړې ده.
اوس د دغه ښوونځي زدهکوونکي د ودانۍ نه موجودیت له کبله تر شنه اسمان لاندې او په جومات او حسینیه کې زدهکړې کوي.
دغه کروندګر وايي، تیار دی چې نوره ځمکه هم د ښوونځيو لپاره ځانګړې کړي.
په همدې حال کې د یادې سیمې ځینو نورو اوسېدونکو هم له پوهنې ریاست سره د ښوونځیو جوړولو لپاره د مېزونو، څوکیو او په ښوونځیو کې د لابراتوارونو لپاره د نورو وسایلو مرسته کړې ده.
د بامیان د پوهنې ریاست سرپرسته فوزیه محبي وايي، یادو کسانو د تېر کال له ژمي نه تر اوسه شاوخوا ۱۴ جریبه کرنیزه ځمکه د ښوونځیو لپاره ځانګړې کړې ده.
د نوموړې په وینا، د یادو ځمکو په ځانګړې کولو سره به د نږدې لس سیمو ماشومان ښوونځي پیدا کړي.
د بامیان د پوهنې ریاست مسوولان یاد کسان د ښوونې او روزنې ملاتړي بولي او وايي، ښوونځیو ته د ځمکې د ورکړې ترڅنګ یې د ښوونځیو د جوړولو او ښوونکو ګومارلو په برخه کې نغدي مرسته هم کړې ده.
د بامیان د پوهنې ریاست د شمېرو له مخې، اوس نږدې ۱۵۰ زره زدهکوونکي په یاد ولایت کې پر زدهکړو بوخت دي چې له ۴۷ سلنه ډېر هغه یې نجونې دي.
بلهخوا د لوګر په برهکي برک ولسوالي کې یوه دیني عالم احمدالله عابد خپله ۴۰۰ متره مربع ځمکه ښوونځي ته ورکړې ده.
ټاکل شوې په روان کال کې د اقرا پروژې له لارې د شاهویس قرن په نوم د نجونو او هلکانو یو ښوونځی پر یادې ځمکې جوړ شي.
د شاهویس قرن ښوونځی په ۱۳۸۱ کال کې په لوګر کې خپل فعالیت پیل کړ او اوس له زرو ډېر زدهکوونکي لري چې ۳۸۳ یې نجونې دي.
د سږ کال له پیله تر اوسه د لوګر یوشمېر نورو اوسېدونکو هم خپلې ځمکې ښوونځیو ته ځانګړې کړې دي.
د یادونې ده چې د پکتیا او غور اوسېدونکو هم په تېرو کلونو کې خپلې سلګونه جریبه ځمکې ښوونځیو ته ورکړې دي.
