په افغانستان کې د افغان ـ ترک ښوونځیو د زدهکوونکو کورنیو په یوې اعتراضیه غونډه کې له افغان حکومته وغوښتل، د دغو ښوونځیو مسوولیت له ۲۳ کلونو راهیسې د چاغ په نوم غیردولتي بنسټ سره دی؛ نه باید له دې بنسټه واخیستل شي او د ترکیې په حکومت پورې وتړل شي.
دغو کورنیو وویل، په افغان ـ ترک ښوونځیو کې زدهکوونکو د وړتیاوو له مخې شاملیږي؛ که حکومتي شي ښايي د زدهکړو بهیر زیانمن وویني.
د زدهکوونکو کورنیو له دغو ښوونځیو د ملاتړ په پار یو میلیون لاسلیکونه راټول کړي، تر څو د ښوونځیو حکومتي کېدو مخنیوی وکړي.
د افغان ـ ترک ښوونځي یوې زدهکوونکې ملالۍ بارکزۍ وویل، د دې ښوونځیو د مسوولینو انګېزه د ښوونې او روزنې بهیر ته خدمت کول دي او دوی په دې برخه کې زیاتې لاسته راوړنې لري.
اوسمهال شاوخوا ۸ زره زده کونکي په مرکز او ولایتونو کې په دغو ښوونځیو کې زده کړې کوي.
تېر کال په ترکیه کې له یوې ناکامې کودتا وروسته د ترکیې دولت فتح الله ګولن د کودتا په طرحه کولو تورن کړ. په ورته وخت کې د فتح الله ګولن غورځنګ د افغانستان په ګډون د نړۍ په زیاترو هېوادونو کې کلتوري او ښوونیز پروګرامونه لري، چې له کودتا وروسته د ترکیې دولت په ټولو هېوادونو کې د دغو ښوونځیو د تړلو غوښتونکی شو.
خو په افغانستان کې د افغان ـ ترک د ښوونځیو پرانیستي پاتې کېدو په اړه ولسي جرګې له حکومته غوښتل، چې د ترکیې له حکومت سره خبرې وکړي.
د چاغ ښوونیز او روزنیز بنسټ د افغانستان اقتصاد او بهرنیو چارو وزارت کې ثبت دی؛ له ۲۳ کلونو راهیسې یې یو ښوونځی په کابل او ۱۱ په ولایتونو کې لري.
