افغانستانده اداری فسادگه قرشی کورهش و نظارت قیلیش قوشمه ایرکین کمیتهنینگ ایتیشیچه، افغانستانده اداری فسادگه باش قارهلاوچیلیک یاردم بیرهدی.
اداری فسادگه قرشی کورهش و نظارت قیلیش کمیته، بوگونکی گزارشیده باش قارهلاوچیلیکده اداری فساد موجودلیگیدن خبر بیردی.
شو توغریده یولگه قوییلگن ییغینده اداری فسادگه قرشی کورهش و نظارت قیلیش کمیته مسؤولی حمیدالله توابنینگ ایتیشیچه، اوشبو گزارش کابل و باشقه ولایتلرده 230 قانونچی، مدافع وکیللر و اجتماع اهالیسی بیلن صحبت اوتکزیلیب تیارلنگن.
جناب توابگه کوره، اولرنینگ قولگه کیریتگن معلوماتلری اساسیده، باش قارهلاوچیلیکده اداری فسادگه قرشی کورهش و ایش لایحهسی یخشیلنیشی خصوصیده بعضی بیر ایشلر بولگن، بیراق حاضرگچه پاره خورلیک، رسمیلرنی ارهلشی و باشقه ایریم قیینچیلیکلر بو اداره ده موجود دیر.
اداری فسادگه قرشی کورهش و نظارت قیلیش کمیته گزارشیگه کوره، حاضرگی شرایطده قضایی مدیریت سیستمهسی، تدقیقات و قضیهلرنی تیکشیریش ایریم قیینچیلیکلرگه روپهره بولیب تورگن.
اداری فسادگه قرشی کورهش و نظارت قیلیش قوشمه ایرکین کمیته، اوشبو گزارشیده باش قارهلاوچیلیکدن شفافیت ایجاد ایتیش، مذکور اداره دن اداری فسادنی نابود ایتیش، ایشلاوچی تنلشده، همکارلیک، قضیهلر مدیریتی، تدقیقات، اداری اصلاحات، پلان توزهتیش و بودجهگه اصلاحات کیریتیشینی سورهگن.
ییغینده نطق سوزلهگن باش قارهلاوچیلیک اورین باسری نورالحبیب جلالزینینگ ایتیشیچه، اوشبو ادارهده اداری فسادگه قرشی کورهش جدی شکلده دوام ایتماقده و حاضرگچه بو بولیمده کوپ ایش بولگن.
جناب جلالزینینگ کوپهیتیریشیچه، اولر مذکور اداره دن اداری فسادنی نابود ایتیش و کوپراق شفافیت کیلتیریشده اداری فسادگه قرشی کورهش و نظارت قیلیش کمیتهنینگ یاردمیگه احتیاج دیر.
اوشبو گزارشنی ایشی 1395- ییل میزان آییده باشلنگن و حاضر یکونلنگن.
