افغانستانده اداری فسادگه قرشی کورهشنی تیکشیریش و نظارت قیلیش قوشمه مستقل کمیته یا-ده میک، عدلی و قضایی بولیملر توغریسیدهگی تورتینچی گزارشینی بوگون نشر قیلدی.
گزارشده کیلیشیچه، مذکور کمیته نینگ تکلیفلرینی عملگه آشیریشده باش قارهلاوچیلیک ادارهسی تکلیفلردن کوپینچهسینی عملگه آشیرگن.
کابلده خبری بیر ییغین اوتکزگن مذکور کمیتهنی دبیرخانه باشلیغی میوند روحانی نینگ ایتیشیچه، اولر ایکی ییل جریانیده کیین مه کیین 8 گزارش نشر قیلهدیلر و شونچه مدتده اولرنینگ برچه تکلیفلری عملگه آشیریلیشی کیرهک.
جناب روحانی گه کوره، باش قارهلاوچیلیک ادارهسی، اولردن 51 تکلیفی دن 40 تهسینی عملگه آشیرگن.
میک کمیتهسی دبیرخانه باشلیغی گه کوره، برچه ولایتلرده عدلی طِب ایجاد ایتیلیشی و اولرنینگ مسؤولیتی ساغلیقنی سقلش وزیرلیگی دن ایچکی ایشلر وزیرلیگی گه تاپشیریلیشی، 57 ناتینچ تومنده باش قارهلاوچیلیک دفتری فعال قیلینیشی، باش قارهلاوچیلیکده عیاللرنینگ سهمی کوپهیتیریلیشی، عیال مدافعه وکیللرنینگ سانی آشیشی، فسادگه قرشی کورهش کمیته ایجاد ایتیلیشی و شکایتلر تیکشیریلیشی خصوصیده، صندوقلر ایجاد قیلینیشی مذکور کمیته نینگ تکلیفلریدن بولیب و کوپینچهسی عملگه آشیریلگن.
اداری فسادگه قرشی کورهشنی تیکشیریش و نظارت قیلیش قوشمه مستقل کمیته اعضاسی سمیع هلالی نینگ ایتیشیچه، دولتی ییریک رسمیلرنینگ دوسیهلری اوستیگه هم ایش قیلینگن.
افغانستانده اداری فسادگه قرشی کورهشنی تیکشیریش و نظارت قیلیش قوشمه مستقل کمیتهسی اوتگن آی هم ملی کینگش توغریسیده گزارش نشر قیلگن ایدی و او گزارشده نمایندهلردن بیرقطاری نینگ قانوندن باش تارتیشلری قید ایتیلگن.
