بارسلونا د یوونتوس لوبډلې پر وړاندې د ۳ـ۱ ګولونو په وهلو سره د اروپا د اتلولۍ جام اتل شو.
د بارسلونا لوبډلې کوچ لوییس انریکه په مشرۍ وکولای شول، چې تېره شپه د ( جون په ۶مه) د یونتوس لوبډلې په خلاف ایوان راکیتیج، سوارز او نیمار د ګولونو په وهلو سره لوبه د بارسلونا په اتلولۍ پای ته ورسوي.
ایوان راکیتیج د لوبې په پيل کې په ۴ دقیقه کې ګول وواهه او دروازه یې د خپلې لوبډلې پر مخ خلاصه کړه.
د بارسلونا لوبډلې د لومړي ګول له وهولو وروسته پر سیالې لوبډلې تخنیکي بریدونه شروع کړل او لوبه لومړۍ نیمايي، د بارسلونا په لومړي ګول سره پای ته ورسېده.
د لوبې په دویمه نیمايي کې د بارسلونا لوبډلې لوبغاړو د سیالې لوبډلې په خلاف خپله لوبه لا چټګه کړه، چې د لوبې په ۵۵ دقیقه کې د یوونتوس لوبغاړي الوارو موراتا له خوا لوبه د یو ګول په وهولو سره برابره شوه او په دې سره د یوونتوس لوبډله بیا ژوندۍ شوه.
د لوبې په دویمه نیمايي کې بارسلونا څو ځلې پر سیالې لوبډلې د ګول وهلو چانس پیدا کړ، خو د یوونتوس د ګول ساتونکي (لوی جي بوفون) له خوا يې مخه و نیول شوه.
یوونتوس لوبډلې د نه ستړې کېدونکو مڼدو سره – سره په دې ونه توانېدل، چې دویم ګول ووهي. د لوبې په ۶۸ دقیقه کې د لیونل مسي په مرسته سوارز ته توپ ورسېد او د بارسلونا په ګټه دویم ګول هم ووهل شو.
د لوبې په درشل کې سیاله لوبډله د نه ستړې کېدونکو هلوځلو سره – سره په دې ونه توانېده، چې د بارسلونا ځواب ورکړي. تر دې چې د لوبې په ورستیو شېبو کې نیمار د یوې ځانکړې موکې په پيدا کولو سره د سیالې لوبډلې په دروازې یې بې رحمانه ګذار وکړ او په دې سره بارسلونا سیاله لوبډله په ۳ ګول سره په ګونډو کړه .
بارو سلونا د دغې لوبې په اتلولۍ سره د اتلولۍ درې لوی جامونه خپل کړل.
بارسلونا لوبډلې له دې وړاندې لالیګا او د اسپانیا حذفي جام سیالۍ هم ګټلې وې.
