سلاموطندار تامانیدن قولگه کیریتیلگن معلوماتلر اساسیده، غزنی خلقینینگ پارلماندهگی نمایندهسی سیدمحمد موسی جناب، مذکور ولایتنی ناتینچ قیلیش خصوصیده، قوراللی گروهلرنی جهازلب و حمایه قیلگنی باعث، جاری ییل کمیده 10 میلیون افغانی قولگه کیریتگن.
آتی فاش ایتیلیشینی ایستمهگن بادغیس ولایتی امنیتی رسمیلریدن بیرینینگ بیاناتلری اساسیده، نجیبالله، نورالله پهلوان و ملا عصمت همراهلیگیده سیدمحمد موسی جناب، بادغیس ولایتی آبکمری تومنینینگ ناتینچ قیلیش خصوصیده سعی و حرکت قیلگن. آبکمری تومنی اقتصادی جهتدن یخشی اهمیتگه ایگه بولگن؛ بادغیس ولایتینینگ، پسته اورمانلریدن 80 فایزی مذکور تومنده قرار تاپگن. ایتیلیشیچه، جناب موسی، محصولات کوتریلهدیگن چاغده، منطقه خلقیدن سالیق آلهدی و بو یول ارا هر ییل کوپ پول قولگه کیریتهدی.
بو اساسده، بادغیس ولایتی آبکمری تومنینینگ ناتینچلیگیگه سبب بولگن قوراللی کیشیلر طالب ایمس دیر و خلق نمایندهسی جناب موسی، پسته محصولاتیدن قولگه کیریتگن پولی بیلن فرمانیده بولگن قوراللی کیشیلرنی حمایه قیلیب و جهازلهیدی.
شونینگدیک، بادغیس خلقینینگ پارلماندهگی نمایندهسی قاضی عبدالرحیم رهیننینگ ایتیشیچه، آبکمری تومنیدهگی ناقانونی قوراللی کیشیلر قومندانی نجیبالله طالب ایمس دیر. جناب رهینگه کوره، نجیبالله مملکت ملی پولیس کوچلرینینگ منسبدارلریدن بیری ایکن و بیر قضایی دوسیه آستیدن قاچیش مقصدیده، قورال آلیب دولتگه قرشی اوروشگن. جناب رهیننینگ ایتیشیچه، نجیبالله قورالدن بوشهتیلیشی و تسلیم بولیشی خصوصیده، حکومتگه نیچه ریجه تکلیف قیلگن؛ بیراق اوشبو تکلیفلر امنیت و قضایی رسمیلر تامانیدن قبول قیلینمهگن.
بیر سیسلی حجتده، سیدمحمد موسی جناب، رقم لری 40 گه ییتیشهدیگن قطار قوراللی کیشیلر بیلن سوزلهیدی. اوشبو گروه ملاعصمت رهبرلیگیده، آبکمری تومنیده فعالیت قیلهدی. اوشبو سیسلی حجتده جناب موسی، ملاعصمت گروهیدن قوراللرینی بیر ییرده یاشیریب و بیر ناراضیلیک نمایش یولگه قوییش اوچون، بادغیس ولایتینینگ مرکزی قلعهنوگه باریشلرینی سورهیدی. شونینگدیک، اوشبو مجلس نمایندهسی، فرمانیدهگی قوراللی کیشیلرگه تینچ اهالینی زوردن ناراضیلیک نماییشیگه قوشیشلری خصوصیده بویروغ بیرهدی.
بیراق، جناب موسی سلاموطندار بیلن اوتکزگن صحبتیده، اوشبو مسئلهنی اوزیگه قرشی دسیسه بیلیب و سلاموطندار خبرچیسینی دشمنلریدن پول آلیشگه عیبلهگن.
باشقه تاماندن، قاضی عبدالرحیم رهیننینگ ایتیشیچه، آبکمری تومنینینگ ناتینچلیگیگه نجیبالله و بادغیس ولایتی پولیس کوچلریدن بیرقطاری سبب بولگن. اونینگ کوپهیتیریشیچه، 1394- ییل، پسته اورمانیدن 93 مینگ هکتاری، دولتگه قرشی قوراللی کوچلر حاکمیتیده ایکن و اوندن چیقگن محصولات، دولتگه قرشی قوراللی کیشیلر قولیگه توشگن.
آتی فاش ایتیلیشینی ایستمهگن بادغیس ولایتی منبعلریدن باشقه بیرینینگ، سلاموطندارگه ایتیشیچه، مجلس نمایندهلری نینگ، دولتگه قرشی قوراللی کیشیلر بیلن علاقهده بولگنی، یالغیز سیدمحمد موسی جناب بیلن یکونلنمهیدی؛ بلکیم اوشبو نمایندهلردن کوپینچهسی، طالب آتیده قوراللی گروه تربیهلگن و اولردن سیاسی منفعتلری اوچون فایدهلنهدی و تیزیم نابود ایتیلیشیدن هم قورقمهیدیلر.
افغانستان امنیتی کوچلری، هردایم مجلس نمایندهلرینینگ، باسقینلریدن شکایت قیلیب و اوشبو نمایندهلردن بیرقطاری، امتیاز آلیش مقصدیده، امنیتی کوچلر و محل یشاوچیلریدن فایدهلنیب و منطقهده ناتینچلیک یرهتیش خصوصیده، سعی و حرکت قیلیشلرینی ایتگن.
بادغیس ولایتینینگ آب کمری تومنی، اوتمیشلرده مذکور ولایتنی تینچ تومنلریدن بیری ایدی و شونینگدیک، «تینچ تومن» آتیگه اتلگن. بادغیس ولایتینینگ، پولیس قومندانی جنرال عبدالرؤفنینگ ایتیشیچه، سونگی کونلرده دولتگه قرشی قوراللی کوچلر آبکمری تومنی و قادس اوستیگه هجوم اویوشتیرگن و نیچه ساعت توقنهشوودن کیین، امنیتی کوچلر، اوشبو هجومنی آرقهگه چیکیلتیرگن.
