بادغیس ولایتی مردمی کینگشینینگ باشلیغی سیدمحیالدین هاشمینینگ کابلده ایتیشیچه، سونگی بیر نیچه ییل جریانیده بادغیس ولایتی قیته قوریلیشی اوچون کومک ایتیلگن 183 میلیون دالر بوتونلی حیف و میل ایتیلگن. بوگون مملکت غرب حوزهسی کینگشی تاسیس ایتیلیشی مناسبتی بیلن اوتکزیلگن ییغینده سوزلهگن جناب هاشمی بادغیس خلقی وضعیتی توغریسیده تشویش بیلدیریب مالی و اداری فساد، ایشسیزلیک و نابرقرارلیک ایسه اهالینی جدی معمالرگه روپه ره قیلگن دیگن.
جناب هاشمیگه کوره، ملی بیرلیک حکومتی اساسا ملی نفاق حکومتی دیر. قومچیلیک، سمتچیلیک هر کون حکومت بیلن اهالی اورتهسیده فاصلهلرنی کوپیتیریب بارماقده. اونگه کوره، اهالی اینیقسه اوچینچی ولایتلر جمله دن اوزاق حدودلرده استقامت قیلهدیگن اهالی کون – ساین اوتیشی بیلن حکومتدن ایشانچ لرینی اوزماقده.
غرب حوزهسی مردمی و اجتماعی کینگشینینگ ملی بیرلیک کینگشی هرات، بادغیس، غور، فراه و نمیروز ولایتلریدن تشکیل ایتیلگن.
مذکور کینگشنینگ ییغینیده شونینگدیک کابلده هرات کینگشینینگ باشلیغی عبدالحق دانشمل ایشسیزلیک، قشاقلیک و مخدر مادهلر ایشلیب چیقاریلیشیگه اشاره قیلیب هیچ بیر دوره بوگونگچه افغانستان خلقینینگ آبرو وحیثیتی دنیا بویلیب سوال استیگه کیتمهگن دیگن. جناب دانشملگه کوره، افغانستان دشمنلری هر دایم پسترمه ده اولتیرگن و اهالی نارضیلیگینی سوء استعمال قیلیش اوچون سعی و حرکت قیلهدیلر.
حکومتنی جدی تنقید قیلگن فراه ولایتی مردمی کینگشینینگ باشلیغی گلمحمد ابوبکرنینگ سوزلریگه کوره، حکومت اهالی گه بیرگن وعدهسیگه اصلا وفا قیلمهگن. جناب ابوبکر ملی بیرلیک حکومتی بوندن آرتیق اهالی ایشانچینی قولدن بیرمسلیک اوچون بیرگن وعدهلریگه عمل قیلیشی مقصدگه موافق دیگن.
شونینگدیک غرب حوزهسی مردمی کینگشی ییتی مادهلیک بیر قطعنامه صادر قیلیب، دولت بلند مرتبهلی لوازملریگه تعین ایتیله دیگن شخصلر جدی صورتده نظرده توتیلیشی باره سیده تاکیدلنگن. شونینگدیک قطعنامهده ولایتلرده بومیلر اورنیگه محلنینگ اوز کادرلری ایشگه آلینیشی توغریسیده علیحده تاکیدلهگنلر.
کینگش ییغینینینگ سونگیده جناب رفیق شهر سوزگه چیقیب قطعنامهده یازیلگن ایستکلر هیچ بیری بنیادی ایمس برچهسی وقتینچهلیک بولگن لیگینی بیلدیرگن. جناب شهیرنینگ سوزلریگه کوره، مملکتدهگی بوتون بختسیزلیکلر مرکزی حکومتدن ایلدیز آلهدی. مرکزی حکومت محلی حکومتلرگه اصلا ایش قیلیش اوچون صلاحیت بیرمهگن دیدی جناب شهیر.
افغانستان بویلب اوتکزیله دیگن کینگشلرده هر دایم مرکزی حکومت نینگ قیلیمیشی تنقید آستیگه آلینهدی. ایتیلیشیچه، ولایتلرده کادرلر تعین ایتیلیشده هیچ بیر زمان تخصیصلر همده عدالت نظرده توتیلمیدی. عین حالده، جناب غنی بیلن عبدالله نینگ سیلاولر جریانیده بیرگن وعدهلرینینگ هیچ بیری عملده تطبیق ایتیلمهگن. ایتیلیشیچه، حکومتنینگ ایشیدن بیر ییل اوتیشیگه قرهمی هنوزهم ملی سویهده هیچ بیر ایش بولمهگن
