یقینده پولند پایتختی وارسا شهریده ناتوگه اعضا دولت‌لر همده افغانستاننی حمایت ایتووچی ناتوگه اعضا بولمه‌گن ایریم مملکت‌لر رهبرلری و نماینده‌لری ییغینی بولیب اوتدی. جولای نینگ 8 – و 9 – کونلری اوتکزیلگن اوشبو ییغین‌نینگ ایکینچی کونیده افغانستان وضعیتی محاکمه ایتیلیب، افغانستان دولتی و خلقی‌نی ترورچیلیک تامانیدن عمل‌گه آشیریله دیگن تهدیدلر برابریده حمایت ایتیش مساله‌سی اوستیده بحث ایتیلدی.
وارسا ییغینی‌ده قتنشگن دولت‌لر نماینده‌لری همده ناتوگه اعضا دولت‌لر رهبرلری 2020 ییل نینگ آخریگه قدر هر ییلی 5 میلیارد دالر افغانستان دولتی‌گه یاردم کورستیش‌لری بارهسیده وعده بیرگن‌لر. مذکور مبلغ نینگ 3.5 میلیارد دالرینی امریکا تامانی، بیر میلیارد دالرینی ناتو گه اعضا باشقه دولت لر توله یدیلر. بو آره ده 500 میلیون دالر افغانستان حصه سی. عین حالده ییغین اشتراکچی‌لری کیسکین حمایت ماموریتی‌نی آلدینگی‌گه کوره کینگراق مقیاس‌ده اوز فعالیت‌لرینی عمل‌گه آشیریشی اوستیده هم تاکیدله دیلر.
معلوم که کیسکین حمایت ماموریتی چارچوبه‌سیده افغانستان حربی‌لری ناتو گه اعضا دولت‌لر و اولرنینگ شریک‌لری تامانیدن افغانستان ایچکریسی‌ده تیارگرلیکدن اوتکزیله دیلر. شونینگ‌دیک مملکت حربی کوچلری‌گه لازم مصلحت‌لر بیریله‌دی و کیره‌ک‌لی پیت‌لرده جنگ میدان‌لریده هم حمایت ایتیله دیلر. حاضرگی کونده ناتونینگ کیسکین ماموریتی چارچوبه‌سیده افغانستانده خذمت قیله دیگن حربی‌لر سانی 13 مینگ کیشی‌نی تشکیل ایته‌دی. ناتو، وارسا ییغینی‌ده مذکور کوچ‌لرنی 2017 ییل نینگ آخریگه‌چه افغانستانده قالیشی‌نی معلوم قیلدی. شونینگ‌دیک ناتو باش کاتبی وینس استولتنبرگ کیره‌ک بولگن وقت‌گه قدر ناتو حربی‌لرینی افغانستانده قالیشی‌نی هم تیلگه آلگن.
در واقع وارسا ییغینی قرارلری افغانستان‌نینگ بوگونی و کیله‌جگی اوچون کته اهمیت‌گه ایگه. چون که ییغین اشتراکچی‌لری اینیقسه ناتو افغانستاننی ترورچی‌لرنینگ خوف‌سیز مرکزیگه ایلنیش‌لیککه زینهار رخصت بیرمس لیگی‌نی تاکیدله گنی ینه بیر افغانستان خلقی اینیقسه امنیتی کوچلرینی کیله‌جککه امیدوار ایته دی.
باشقه تاماندن مملکت دشمن‌لری جمله‌دن ترورچی گروه‌لر و اولرنینگ حامی‌لری نی مایوس ایتیشی و جنگ جبهه‌لریده اولر نینگ شکست‌لریگه باعث بولیشی طبیعی بیر حال. وارسا مجلسی‌دن ایکی کون آلدین امریکا قوشمه ایالت‌لری جمهور رییسی باراک اوباما امریکا حربی‌لری نینگ 8500 نفری نی 2016 ییل نینگ سونگی قدر افغانستان ده قالیشی‌نی اعلان ایتگن ایدی. اوباما افغانستان وضعیتی نی یقین‌دن تیکشیرگن حربی و سیاسی مصلحتچی‌لری ایسته‌گی همده افغان لر یورتی‌ده حکم سوره دیگن قلتیس وضعیت‌نی انابت گه آلیب بو خصوصده‌گی قرار نی قبول ایتگنی‌نی بیلدیرگن. باراک اوبا نینگ آلدینگی ریجه‌سی اساسی ده 2016 ییل آخریگه کیلیب امریکا حربی‌لری سانی 5500 کیشی‌گه قیسقرتیریلیشی نظرده توتیلگن ایدی.
گرچند ناتو نینگ افغانستانده‌گی حربی ماموریتی 2014 – ییل ده اوز نهایه‌سیگه ییتگن. اوشبو سنه دن بیری مملکت‌نی حمایت ایتیشی مستقل طرزده افغانستان خوفسیزلیک کوچلری ایلک سی‌گه یوکله تیلگن. افغانستان حربی کوچلرینی زمانوی حربی قورال اسلحه‌لر بیلن کوپراق جهازلنتیریلیشی همده هوا کوچلری نی اوز آیاق لری اوستیده استوار توره آلگونیچه غرب دولت‌لری نینگ هر تامانلمه حمایتی‌گه احتیاجی بارلیگی سیزیلیب توریبدی.
بوندن آلدین هم ناتو بلند مرتبه‌لی رسمی لری کیره‌ک بولگن وقت‌گه قدر افغانستاننی حمایت ایتیش‌لرینی بار بار تاکیدلب کیلگن لر. ناتو و دنیا جمعیتینی افغانستان بیلن مناسبتی‌نی بیر یاقلمه یول دیب توشینیش توغری بولمه‌یدی. 2001 ییل آخریدن بیری بوکونگه قدر غرب دولت‌لری افغانستان دولتی و خلقی‌نی هر تامانلمه حمایت ایتیب کیلماقده‌لر. انه شو مدت دوامی‌ده غرب دولت‌لری افغانستان‌گه میلیاردلب دالر یاردم کورستدی‌لر.
اوشبو یاردملرنینگ معلوم قسمی سؤ استعمال ایتلگنی بارهسیده هم معلومات‌لر نشر ایتیلماقده. افغانستان دولتی جمله‌دن حربی بولیم‌لریده فساد و پاره خوارلیک شونینگ‌دیک دولت‌نینگ مال مُلک‌لری سؤ استعمال ایتیلیشی رسمی کابل‌نینگ اینگ اساسی معمالری‌دن بیری سنه‌له‌دی.
ایندی لیکده دنیا دولت‌لری افغانستان خلقی و دولتی‌گه کورسته دیگن یاردم‌لری برابریده رسمی کابل‌دن هم معین ایستک‌لری بار. اوشبو ایستک‌لر وارسا ییغینی سونگیده ترقه تیلگن بیر قوشمه بیانات‌ده عکس ایتیدیریلگن. اوشبو بیانات‌ده، فسادنی یوق قیلیش، حسابات بیریش‌ده شفافلیک‌نی رعایت ایتیش، مملکت اقتصادی‌نی رواجلنتیریش، انسان حق‌لری جمله‌دن باله‌لر و عیال‌لر حق لرینی تامینلش کبی مساله‌لر قید ایتیلگن.
در واقع ایندی نوبت افغانستان دولتی‌گه. جمهور رییس محمد اشرف‌غنی و دولت نینگ باشقه بلند مرتبه‌لی رسمی لرینی مملکت‌ده فسادنی یوق قیلیش همده انسانلر حقلری‌نی تامینلش و اقتصادنی رواجلنتیریش اوچون قوشیمچه و جدی چاره تدبیرلر کوریشی کیره‌ک بوله‌دی. بیر جهت‌دن آلیب قره لگن‌ده اوشبو معمالرگه غلبه قیلیش کوپ هم قیین ایمس دیک کورینه‌دی. نیگه دیگن‌ده؛ پایتخت کابل و اطراف ولایت‌لرده بیرینچی و ایکینچی درجه‌لی مسوول شخصلرنی وطن‌گه و خلققه صادق، پاک نفس، ایش بیلرمان و عین حالده جسور شخصلرنی تعیین‌لش بیلن معمانی آز وقت ایچیده ییچیش ممکن بوله‌دی. نخاتکه اوتیز میلیون کیشی افغانستان اهالیسی آره‌سی ده ملتی‌نی و خلقی‌نینگ کیله‌جگینی اویله یدیگن صادق انسانلر تاپیلمسه.
