افغانستان تینچلیک لایحهسی بوییچه آمریکا خاص نمایندهسی زلمی خلیلزاد، ایکی آی توختهتیلیشیدن سونگ، بلژیک و فرانسهگه سفر قیلیب ناتو باش کاتبی بیلن افغانستان تینچلیک لایحهسی خصوصیده صحبت قیلگن.
سیاسی ایش بیلرمانلردن بیرقطاری نینگ ایتیشیچه، بو مرته تینچلیک سوزلشوولرنینگ ایجابی نتیجه بیریشی ممکن.
سیاسی ایش بیلرمانلردن بیری محبالله شریف نینگ ایتیشیچه، آمریکا تامانیدن تینچلیک سوزلشوولرنینگ توختهتیلیشی راهبردی بیر ریجه ایدی و اوشبو مملکت افغانستانده بولگن حربی هزینهسینی کمهیتیریش اوچون سعی و حرکت قیلهدی.
بوندن آلدین طالبان گروهی نینگ قطردهگی سیاسی دفتری سوزلاوچیسی سهیل شاهین، هندوستانلیگ بیر میدیا بیلن صحبت اوتکزیب، طالبان و آمریکا آرهسیده بولگن تینچلیک شرطنامه امضا ایتیلگنیدن سونگ، اوشبو گروه نینگ افغانستان حکومتی بیلن مذاکره قیلیشی ممکن دیگن ایدی.
سیاسی ایش بیلرمانلردن باشقه بیری وحید مژده نینگ ایتیشیچه، جمهورلیک ریاستی سیلاو نینگ نتیجهسی اعلان ایتیلگنیدن سونگ، آمریکا و طالبان نمایندهلری آرهسیده بولگن تینچلیک سوزلشوولر باشلنهدی.
جناب مژده گه کوره، طالبان و آمریکا آرهسیده بولگن تینچلیک شرطنامه امضا ایتیلمسدن آلدین طالبان گروهی آتیشکیسین قیلمهدی و افغانستان حکومتی بیلن مذاکره قیلشگه حاضر بولمهیدی.
شونینگدیک، بوگون "سهشنبه" جمهورلیک ریاستی سوزلاوچیسی صدیق صدیقی نینگ تویتر صحیفهسیده یازیشیچه، تینچلیک افغانستان حکومتی اوچون اولویتگه قرار تاپگن و افغانستان یشاوچیلری دایمی تینچلیک ایستهیدی.
اونینگ کوپهیتیریشچه، تینچلیک لایحه حکومت تامانیدن رهبرلیک قیلینگن صورتده، افغانستان دایمی تینچلیککه قول تاپهدی.
ایتیلیشیچه، بوندن آلدین اروپا بیرلشمهسی نینگ ایلچیسی و نمایندهسی تینچلیک سوزلشوولرنینگ افغانستانلیکلر تامانیدن رهبرلیک ایتیلیشی اوستیگه تاکید قیلگن ایدی.
