ایراني چارواکیو د دغه هېواد په پلازمېنې تهران کې د یوې اوکرایني الوتکې د لوېدو له کبله د ۱۷۹ کسانو چې ۱۰ یې افغانان دي، د وژل کېدو خبر ورکړی دی.
د ایران د دولت ویاند علي ربېعي ویلي چې د یادې الوتکې د لوېدو له کبله ۱۴۴ ایرانیان، ۱۱ او کراینیان، ۱۰ افغانان، ۹ کاناډایان، ۴ سویډنیان او یوه برټیانیايي وګړي خپل ژوند له لاسه ورکړی دی.
ربېعي زیاته کړې، یادې الوتکې د تخنیکي ستونزو له کبله اور اخیستی او په تهران کې لوېدلې ده.
خو د اوکراین د هوايي کرښو ویاند ویلي چې یادې الوتکې هېڅ ډول تخنیکي ستونزه نه لرله او دوه ورځې مخکې ارزول شوې وه.
