د کرکټ اسیايي شورا غونډه کې پریکړه وشوه، چې د راتلونکې ۲۰۱۶م ز کال لومړی پړاو ۲۰ اوریزه (ایشیا کپ) کرکټ سیالۍ به یو ځل بیا په بنګله دېش کې ترسره شي.

پدې سیالیو کې به د اسیا بشپړ غړیتوب لرونکي پاکستان، هندوستان، کوربه بنګله دېش او دفاعي اتله سریلانکا کرکټ لوبډلې نیغ په نیغه ولوبېږي، خو له افغانستان سره د تېرکال په پرتله برعکس رویه وشوه.

که څه هم تېرکال ۲۰۱۵م کال پنځوس اوریزه کرکټ نړیوال جام سیالیو ته د ښه تیاریو په موخه افغانستان ته د وخت کرکټ بورډ چارواکو په هلو ځلو نیغه په نیغه د لوبیدو چانس ورکړل شوی وو، خو دا ځل کیسه بدله ده.

د کرکټ اسیایي شورا د پریکړې له مخې باید افغانستان د هانګ کانګ، کوربه عربي امارات او عمان سره په ګډه  په عربي اماراتو کې شل اوریزه ایشیا کپ سیالیو ته د لارې موندنې په موخه ټاکنیزپړاو لوبې ترسره کړي.

ددې ټاکنیزپړاو اتله لوبډله به د بنګله دیش په کوربتوب لومړي پړاو شل اوریزه (ایشیا کپ) کرکټ سیالیو ته غوره شي.

د یادونې وړ ده، چې د کرکټ اسیایي شورا غونډه په سینګاپور کې ترسره شوه چې په لومړی پړاو شل اوریزه ایشیا کپ سیالیو له پاره د راتلونکې ۲۰۱۶ م ز کال فیبرورۍ میاشتې ۲۴ مه نیټه اعلان شوه.

ویل کیږي، چې د ۵ هیوادونو ایشیا کپ سیالۍ به د مارچ میاشتې تر ۶ مې نیټې روانې وي او د شپږم پړاو شل اوریزه کرکټ نړیوال جام سیالیو د پیل ۵ ورځې وړاندې به پای ته ورسیږي.

د غه راز هندوستان کرکټ بورډ د پاکستان کرکټ بورډ غوښتنه ومنله، چې سیالۍ د اعلان شوې نیټې وروسته کړي ترڅو د پاکستان لومړي پړاو (سوپرلیګ) سیالیو سره ټکر و نه کړي.

یاده دې وي، چې دا به سر په سر درېیم خو ټولټال د ۱۹۸۸، ۲۰۰۰، ۲۰۱۲ او ۲۰۱۴ م ز کال وروسته پنځم ځل وي، چې بنګله دېش د ایشیا کپ کرکټ سیالیو کوربتوب کوي.

ټاکل شوې ده، چې ایشیا کپ سیالیو ته د لارې موندنې په موخه به دافغانستان، هانګ کانګ او عمان ترمینځ ټاکنیز پړاو لوبې د راتلونکې نومبرمیاشتې په ۲۷ مه نیټه د عربي اماراتو په ابوظبي کرکټ نړیوال لوبغالي کې پیل شي.