افغانستان مالیه وزیری اکلیل حکیمی بوگون (شنبه) خبری ییغین‌ده دولت بلند مرتبه‌لی هیأتی‌نینگ ترکمنستان‌گه قیلگن سفری یوتوقلی دیب ایتیشیچه، اوشبو سفرده ایکی مملکت بلند مرتبه‌لی رسمیلری اورته‌سیده 11 مهم اقتصادی شرطنامه‌گه قول قوییلگن.
بوندن ایکی کون آلدین افغانستانلیک هیأت‌لر اقتصادی همکارلیک اوچون ترکمنستان‌گه سفر قیلیب، او مملکت رسمیلری بیلن ترانزیت، اقتصاد و سوداگرلیککه عاید مهم نیچه کیلیشوونی امضاله‌گنلر.
مملکت مالیه وزیری‌گه کوره، مذکور اولتیریش‌ده ترکمنستان‌دن افغانستانگه برق ییتکزیش، لاجورد دهلیزی ایجاد ایتیلیشی، ترکمنستان گازینی افغانستان آرقه‌لی پاکستان و هندوستانگه ییتکزیش لایحه‌سی (تاپی) ترکمنستان تیمیر یولی‌نی افغانستانگه کیلتیریش ایکی دولت رسمیلری اورته سیده بحث ایتیلگن مهم موردلردن بولگن.
جناب حکیمی‌گه کوره، مذکور پروژه ایشی باشله‌نیشی بیلن مینگلب افغانستانلیک یاش‌گه ایش زمینه‌سی یره‌تیله‌دی. او، شونینگ‌دیک افغانستان و ترکمنستان اورته‌سیده قوشمه اقتصادی برنامه کیلگوسی بیر یریم آی ایچیده عشق آبادده باشله‌نیشی‌نی ایتگن.
شوکبی ییغین‌ده اشتراک قیلگن مملکت کان‌لر وپطرولیم وزیری داودشاه صباگه کوره، جاری ییل سونگی آیلریده تاپی گاز قووری‌نینگ عملی ایشی ترکمنستان جمهورلیگی طرف‌سیزلیک بیره‌می‌نینگ ییگیرمنچی ییللیگی مناسبتی بیلن اوتکزیله‌دیگن بیره‌م کونی باشلنه‌دی.
جناب صبانینگ سوزلریگه قره‌گنده تاپی خط‌لوله پروژه‌سی عملی ایتیلیشی‌نی منطقه اهالیسی نیچه ییلدن بیری کوتردی.
تاپی لایحه‌سی میلادی 2010- ییلده ترکمنستان‌نینگ عشق آباد شهریده افغانستان، هندوستان، پاکستان و میزبان مملکتی اورته‌سیده قول قوییلگن ایدی. اوشبو گاز قووری ترکمنستان‌دن باشله‌نیب هندگه اوز پایانیگه ییته‌دی.
اوشبو لایحه عملی بولیشی بیلن اوتیز ییلگچه هر ییلی 33 میلیارد متر مکعب گاز پاکستان و هندگه صادر ایتیله دی. اوشبو صادرات‌دن کونده 14 میلیون متر مکعب گاز افغانستان سهمی بوله‌دی.
بوندن نیچه وقت آلدین ترکمنستان جمهور رییسی قربان‌علی بردی محمدوف کابل‌گه قیلگن سفریده افغانستان جمهور رییسی محمد اشرف غنی بیلن اوچره‌شیب، پول یوویش‌گه قرشی کوره‌شیش، تروچیلیک، انرژی بولیمی‌گه همکارلیک قیلیش، ورزش و شونگه اوخشه‌گن نیچه کیلیشووگه قول قویگن ایدی.
