.jpg)
هلمند ولایتی‌نینگ موسی قلعه تومنی یشاوچیسی 24 یاشر نوراحمد قربانی، تورت ییل امنیتی کوچلر یانیده توریب ماین تازه‌لگن و نتیجه‌ده یول چیتیده ییرلشتیریلگن ماین‌نی اوچیره‌یاتگن بیر چاغیده، کوز و آیاقلرینی قولدن بیرگن و حاضر ایکی ییل‌دن بویان اوی چیتیده قالگن.
قربانی، انجنیرلیک فاکولته‌سی‌نینگ ماین تازه‌لش بولیمی‌دن فارغ بولگن و امنیتی کوچلرگه یاردم بیریش اوچون تورت ییل‌لیک خذمتی جریانیده، 511 ماین‌نی اوچیریب و باشقه 33 حلقه ماین‌نی پارتلتگن.
قربانی‌نینگ سلام‌وطندارگه ایتیشیچه، عایله اعضاسی‌دن 6 کیشی طالب‌لرگه قرشی اوروش‌ده هلاک بولگن و آته‌سی رحم‌سیزلیک‌ده طالب‌لر تامانیدن اولدیریلگن.
جمهور رییس غنی، قربانی‌نینگ حال و احوالی‌نی کورگنی‌دن کیین، مملکت‌دن تشقری سفر قیلیب اوزینی دارولش اوچون اونگه 70 مینگ افغانی یاردم بیرگن؛ بیراق قربانی هندگه سفر قیلگن بیرچاغده، داکترلر 70 مینگ افغانی بیلن کوزلریدن یالغیز بیری دارولنمه‌سینی ایتگن و بوتونله‌ی دارولنیشی اوچون 400 مینگ افغانی لازم ایکن.
.jpg)
قربانی‌نینگ ایتیشیچه، هلمند حاکمی حیات‌الله حیات، اونگه 20 مینگ افغانی بیرگن و پایتخت کیلیب اوزینی دارولشی‌نی ایتگن. کابل کیلگنی‌دن 22 کون اوته‌دی و حاضرگچه هیچ بیر دروازه یوزیگه آچیلمه‌گن.
اوشبو ناچار یاش ییگیت عایله‌سی‌نینگ یالغیز نان تاپه‌دیگنی ایکن، دیمک ایکی فرزندی، آنه‌سی و کیچیک ایناغه‌لری‌نینگ مسؤولی بولگن. قربانی‌نینگ عایله‌سی هلمند مرکزی‌ده بدرغه‌لرنینگ خیمه‌لریده حیات کیچیره‌دی؛ چونکه موسی قلعه تومنی‌نینگ امنیتی وضعیتی جوده هم یمان دیر.
قربانی کوز و آیاقلرینی قولدن بیرگن، بیراق ینگی بیر تیریکچیلیک باشلش اوچون کوچلی اراده‌سی بار. اونینگ ایتیشیچه، قیته‌دن آلدینی کورگن تقدیرده، اولکه‌سی اوچون ماین میدانلری‌گه قیتیب و ماین‌لرنی آوله‌شی ممکن.
